Helga Bolla

2009-06-08T12:10:00.006Z

Fyrir fjórum mánuðum setti ég síðast inn færslu hér, nú er sumarið komið og ég í fríi í tæpar tvær vikur. Það er yndislegt, alltaf gott að geta hvílt sig eftir veturinn. Ömmustelpan mín er að verða 10 mánaða, fallegasta barn sem hefur fæðst á síðustu árum. Svo er hún broshýr og skemmtileg og mjög hraust og heilbrigð. Hvað er hægt að biðja um meira??

Núna um helgina fór ég í göngu á Eyjafjallajökul, það var hreint yndislegt. Fallegt veður að mestu leyti, rigndi þó á niðurleiðinni. Goðasteinn heitir þar sem við enduðum uppi, það er stærðar grjót sem er hulið ís. Það var virkilega tígulegt að sjá það blasa við allt í einu, úr fjarska virkaði það ekki nærri eins stórt. En undur falleg sjón.

Á neðri myndinni er ég búin að sigr´ann, afskaplega stolt af því. :)

2009-02-06T20:41:00.005Z

Ég sé þegar ég er að kíkja hér á síðustu blogg sé ég að ég hef gjarnan sest niður þegar einhverjir viðburðir hafa verið í lífi mínu;Símon og Vánia giftu sig, ég fór til Hawaii, Bella bættist í hópinn o.s.frv. Þá uppgötva ég mér til skelfingar að stærsti viðburður síðasta árs hefur ekki komist á blað hér, ekki verið minnst á hann einu orði! Nema í bloggfærstlu frá Hawaii sagðist ég hafa verið að fá góðar fréttir en sagði ekki hverjar. Kannski eru báðir lesendur mínir núna orðnir forvitnir... :o) En, þessi einstæði viðburður í mínu lífi var litla ömmustelpan mín sem fæddist 14.ágúst og heitir Daníela Díana Lopes Símonardóttir. Sjón er sögu ríkari..

2008-08-07T10:47:00.002Z

Nú er orðið heldur langt síðan hér hefur birtst ný færsla, best að skutla einni stuttri inn. Síðan ég kom heim frá Maui í mars hefur auðvitað ýmislegt á dagana drifið, fyrst þarf að nefna nýjan fjölskyldumeðlim. Hún nánast bankaði að dyrum í lok aprílmánaðar, var þriggja mánaða hvolpur sem vantaði heimili. Henni var auðvitað tekið opnum örmum og hefur á þeim tíma sem er liðinn síðan vaxið og dafnað. Hún hefur rúmlega tvöfaldað þyngd sína og er næstum því farin að hlýða líka, en því átti ég nú ekki von á svona framan af. Litla dúllan er nefnilega eilítið baldin. :)

En segjum þetta bara gott í bili, meira síðar.

Maui.

2008-03-03T02:29:00.003Z

Nú má segja að lífið leiki við mann. Ég fékk fréttir í gær (ég veit ekki enn hvort ég má segja frá því..) sem breyttu annars yndislegu sólskini hér í enn fallegri hluti. Ég er auðvitað stödd á Hawaii, var að koma af ströndinni með yndislegum frænkum mínum og börnunum þeirra, búin að slást við strákana þeirra í sjónum og hér heima er systir mín búin að vera að undirbúa kvöldverð mánaðarins. Lyktin er alla vega dásamleg. :o)
Svo ég segi bara aloha í bili, meira seinna.

Áramótadramablogg ;o)

2007-12-30T13:11:00.000Z

Nú er árið að verða liðið í aldanna skaut og allt það. Þetta hefur í heild verið hið besta ár fyrir mig, ekki get ég kvartað. Það endar á svolítið dramatískan hátt í einkalífinu, en það er ekkert sem við lifum ekki af. Ég má bara til á þessum tímamótum að þakka Guði opinberlega fyrir þetta góða ár.

Gleðilegt nýtt ár to y´all!

2007-07-09T21:07:00.000Z

07.07.07.

var brúðkaupsdagurinn mikli um allan heim. Símon minn og Vánían hans giftu sig þá og dagurinn var mjög gleðilegur og vel heppnaður í alla staði. Þau gerðu góða hluti í undirbúningnum, sáu um þetta mest allt sjálf og stóðu sig með stakri prýði. Nú eru þau í Borgarfirðinum að njóta hveitibrauðsdaganna, og njóta þess vonandi alla vikuna. Ekki er alla vega veðrið að spilla fyrir þeim.

Alltaf er nú jafn yndislegt að fara í frí, vakna þegar maður vill, eyða deginum bara eins og manni dettur í hug. Hreinasta unun. Svo verður örugglega bara gaman að koma í vinnuna aftur, ekki vantar sennilega verkefnin þegar að því kemur... Þetta sumar er annars bara búið að vera gargandi snilld, veðrið algjör draumur dag eftir dag.

Annað kvöld mætast svo KR og Valur í bikarkeppninni í Frostaskjóli. Ekki læt ég mig nú vanta þangað, hef nú ekki verið þekkt fyrir það hingað til. :o) Áfram Valur!

2007-06-24T22:10:00.000Z

Góð helgi á enda runnin... nú styttist í að maður taki sér eitthvað sumarfrí. Kominn tími til. Samt nóg að gera í vinnunni, ekki vantar það.
Evrópuleikurinn fór illa í gær, Valsmenn töpuðu fyrir írsku slagsmálahundunum. Það skemmtilega á vellinum voru stuðningsmenn Íranna, ekki hægt annað en hafa gaman af þeim. Hér kemur hugmynd: Íslensk íþróttafélög senda stuðningsmenn sína á námskeið hjá svona alvöru stuðningsmönnum. Þeir gætu tekið lög frá þeim og þýtt og staðfært, kannski fengju þeir svo sínar eigin hugmyndir með tímanum. Við verðum endilega að reyna að þróa okkur í að styðja okkar menn, við erum alveg eins og aular í stúkunni.

I bid u good night.

2007-06-19T15:34:00.000Z

Loksins! Mér tókst að komast inn í þetta blogg mitt, það hefur væntanlega ekki dulist glöggum lesendum mínum að ekki hefur verið mikið líf þar. Nú verður gerð bót á því, alla vega í dag, lofa ekki meiru.
Veðrið í dag er algjör snilld, það gerist ekki mikið betra hér á okkar fagra landi. Ég sit hér í mínum litla (skrúð)garði lítt klædd og nýt sólarinnar, hlusta á yndislega tónlist og hundurinn dormar undir tré. Life is good.
Ég ætla að veðja á Daníelinn í kvöld, hann kemur inn í seinni hálfleik og gerir út um skagabullurnar eins og forðum daga með Víkingum úr Fossvogi. Hver er með í því? Fæ ég amen við því???
Nú held ég að mál sé að halda áfram garðyrkjunni, grasið slær sig ekki sjálft... :)

2007-03-04T10:03:00.000Z

Ég er á DC námskeiði, langt og mikið námskeið, endalaus ræðuhöld og læti. Þegar ég segi læti, þá meina ég læti. Maður er látinn öskra sig hásan hvað þá annað, ekki hef ég grun um hvað ég á að græða á því. Auðvitað lærir maður alltaf eitthvað á námskeiðum, skárra væri það. Ég hef t.d. kynnst fólki sem ég hef haft samskipti við í vinnu án þess að þekkja neitt. Svo er það kennslubókin. Hún er full af furðulegum nýyrðum, mjög hrá þýðing úr amerísku. Hvað þýðir t.d. orðið dagþétt? Hefur einhver heyrt það orð? Lifðu í dagþéttri veröld... útleggst lifðu í núinu. Og bókin er ekki bara full af nýyrðum heldur prentvillum líka, ekki smart. Nóg um það...

Egilshöll í kvöld! Valur - FH kl 19.

Kannski strákurinn sýni einhverja takta? :)

:(

2007-01-29T18:57:00.000Z

Sælt veri fólkið. Ekki verður nú sagt að ég hafi staðið við fögur loforð frá því ársbyrjun um að vera dugleg að blogga. En, nú hreinlega verð ég að láta reyna á bloggið sem þerapíu. Ég er svo niðurdregin að ég næ mér hreint ekki á strik, ástæðan er sú að systir mín, sem býr fáránlega langt í burtu og er búin að vera hér hjá mér í tæpar 3 vikur, (ég búin að eyða flestum stundum með henni í þann tíma) flaug af landinu í dag. Það var ótrúlega dimmt úti þegar ég hljóp í Reykjanessslagviðrinu út í bíl við flugstöð Leifs Eiríkssonar. Kökkur í hálsinum alla leiðina í bæinn þó ég hamaðist við að hugsa gleðilegar hugsanir; t.d. eins og þá að að ári fer ég að öllum líkindum til hennar! Svo reyndi ég að fókusa á augljósar staðreyndir eins og þá að við tölum saman í gegnum msn nokkrum sinnum í viku, höfum oft vefmyndavélar í gangi heilu klukkutímana um helgar og fylgjumst með hvor annarri og umferðinni um heimili hvor annarrar. En svona geta tilfinningarnar farið með mann, maður stýrir ekki alltaf svo glatt hvernig manni líður.
Svei mér þá, ég held mér líði strax betur. Án gríns.
Sjáumst fljótt systir!

2007

2007-01-07T19:50:00.000Z

Nú er double-o-seven árið komið, jólin meira að segja búin. Það er nú alltaf ágætt líka, svona eins og að fara í skemmtilegt frí og koma svo heim aftur. Á hverju ári reyni ég að láta mér detta einhver leið í hug til þess að taka ekki þátt í jólabrjálæðinu hér á landi, ég er ekki frá því að það rofi til í þeim efnum. Ekki eyddi ég miklum tíma eða peningum í ruglið, svo mikið er víst. En þetta verður víst hver og einn að finna út fyrir sig.
Þegar ég hugsa um síðasta ár og hvað gerðist markverðast þar, þá er það "mælanlegasta" sem gerðist hjá mér starf Gospelkórs Rvíkur. Það verður sífellt skemmtilegra með hverju árinu, nýjum hugmyndum og verkefnum virðast engin takmörk sett, það er sérstök blessun að taka þátt í þessu. Það er meira að segja aðeins búið að nefna hugmyndir um næstu verkefni og það hljómar mjög spennandi. Ég mun örugglega skrifa meira um það hér þegar málin skýrast. So, stay tuned! :o)
En það sem er næst á dagskrá er heimsókn stóru systur frá Hawaii, hún er að koma miðvikudaginn 10. og stoppar í 2 vikur. Nú eru liðin 5 ár síðan hún kom síðast svo það er mikil tilhlökkun að fá hana. Ég er sú eina úr fjölskyldunni sem hef farið út til hennar í millitíðinni. Sennilega verð ég sú næsta sem fer út líka, ef að líkum lætur og allt gengur upp.
Þá bara setjum við punktinn hér og lofum öllu fögru um framhald á bloggun.

2006-10-26T22:54:00.000Z

Það var framið þjóðarmorð í Rwanda 1994, milljón manna myrt. Það er búið að verið að drepa saklaust fólk í Írak í nokkur ár og það er allt mögulegt hræðilegt að gerast í heimum. Börn eru að svelta í stórum stíl. Svo ákveða Íslendingar að veiða nokkra hvali þetta árið og það fer allt á annan endann? Er ekkert skrítið við þetta?

Þórsmerkurferð.

2006-10-03T23:12:00.000Z

Það er fátt sem er eins endurnærandi fyrir þéttbýlisþeytispaða eins og þessa hér, að komast út í Guðsgræna náttúruna. Þó ekki sé nema dagsferð eins og sú sem ég fór í á laugardaginn í Þórsmörk. Að eyða degi á slíkum stað, í góðu veðri umkringd haustlitunum reyndist mér algjör vítamínsprauta. Gekk inn í Stakkholtsgjá og þrammaði upp á Valahnjúk og endaði í skálanum í Húsadal með því að snæða dýrindis kvöldverð. Stórkostlegt. Try it!

2006-09-16T10:48:00.000Z

Jæja, nú á ég fleiri stundir,fleiri mínútur, tónleikarnir eru búnir. Lífið hefur ekki snúist um neitt annað hjá mér undanfarnar 2 vikur en tónleika Sálarinnar og Gospelkórs R í höllinni í gær. Nú bíður maður spenntur eftir viðbrögðum við þeim, en það er ljóst að þeir sem stóðu á sviðinu skemmtu sér sko vel. Stefán Hilmarsson er bráðskemmtilegur náungi, það er ekki spurning. Samvinnan við þá var í alla staði mjög góð, þeir eru popparar sem hafa gaman af því sem þeir eru að gera.
Ég saknaði þess að hafa ekkert af afkvæmum mínum í salnum, þeir hafa alltaf komið á tónleika okkar, ætli ég setji þá ekki niður framan við sjónvarpið þegar Rúv sýnir tónleikana í desember... :)

Svo á stóri bró afmæli í dag, til hamingju með það!

2006-08-31T23:03:00.000Z

Ef ég ætti fleiri stundir, fleiri mínútur... þekkir einhver þetta? Þetta kemur í hugann þessa dagana þegar fullmikið er um að vera, meðal annars einmitt við að æfa t.d. þetta tiltekna lag. Ef það hefur farið framhjá einhverjum, þá eru Sálin og Gospelkór Reykjavíkur með tónleika í Laugardalshöll 15. september n.k. Miðasala gengur víst mjög vel, það er víst öruggara fyrir þá sem vilja ekki missa af miðum að fara að kíkja eftir þeim, ég held það sé t.d. uppselt á gólfinu... Á undan syngur Edgar Smári nokkur lög við undirleik Ómars Guðjónssonar, það ætti að vera athyglisvert.

2006-08-26T00:57:00.000Z

Þá er dagur að kvöldi kominn og búið að halda hér hina bestu veislu. Það var grillað kjöt og grænmeti og borðað vel. Maturinn var þó ekki aðalatriðið, heldur félagsskapurinn sem var aldeilis yndislegur.
Mikil blessun að þekkja svona gott fólk...
Monsinn minn er að spila á Rósenberg í kvöld, vona að honum gangi vel. Það var verst að missa hann úr partýinu, hann átti sannarlega gullkorn kvöldsins. Það var verið að ræða hefðir og reglur í Kristnum söfnuðum, á fólk að vera að setja reglur sem það finnur ekki í Biblíunni o.s.frv... Þá benti hann á þá augljósu staðreynd að það væri kross utan á viðkomandi kirkju og forstöðumaðurinn hefði aldrei hangið á honum. Good times.
Þá er best að skella sér í háttinn, I bid u good night.

2006-08-24T23:09:00.000Z

24.08.´78

Það var þennan dag fyrir 28 árum sem frumburðurinn minn fæddist, Það var á fimmtudegi og klukkan var 12:21 og ég sá Rocky Horror í Nýja bíó kvöldið áður.

Ég sé ekki að þú sért neitt minna fullkominn núna heldur en þann dag.

Til hamingju með daginn Dansi. :)

2006-08-23T22:41:00.000Z

23.08.´83

Það er einn af þessum dögum í dag sem ég er bara meir í hjartanu og verð að segja frá því að í dag á yngsti strákurinn minn afmæli, það er 23. og hann er 23 ára í dag. Honum verður ekki líst neitt hér öðruvísi en með þessari mynd, menn geta bara séð sjálfir hvers konar töffari er þarna á ferð. Til hamingju með daginn Jollinn. Über svalur..

Á morgun á frumburðurinn svo afmæli... alltaf skemmtilegir dagar. Þeir halda upp á afmælin sín á meðan ég held upp á minningar um stærstu viðburði lífs míns... :o)

2006-08-22T21:01:00.000Z

Það er ljósmyndari sem fylgir Víkingum hvert á land sem er og tekur þessar líka skemmtilegu myndir í öllum leikjum þeirra og birtir á www.vikingur.net , sem er heimasíða stuðningsmanna. Það er alltaf gaman að skoða myndirnar, þetta er mjög góður ljósmyndari. Myndirnar hér slá þó öllu við fram að þessu (þó kósakkadansinn hafi verið snilld!), þær sýna auðvitað leikmann #10 fara frekar illa með varnarmann Vals.

Ég sé ekki betur en aumingja maðurinn hlaupi í snaröfuga átt.

Æ, æ, æ...

Sumarið hálfnað.

2006-07-11T21:13:00.000Z

Nú er lag að slá inn nokkrar línur þar sem ég flatmaga í stofusófanum á þriðjudagskvöldi og nenni ekki að hreyfa mig. Ítalir orðnir heimsmeistarar í fótbolta. Zidan ákvað að enda ferilinn aðeins fyrr en til stóð, auðvitað hefði verið voða smart að sleppa því að stanga Ítalann í brjóstið, eða er það? Er ekki alltaf best að hlutirnir hafi sinn gang, maðurinn misbauð honum á einhvern máta, hann reiddist og missti sjálfsstjórnina eitt augnablik. Hvað með það? Milljarður manna að fylgjast með leiknum, allra augu á Zidan, allir gera kröfur til hans. Væri ekki skrítnara að ekkert færi úrskeiðis undir annarri eins pressu? Ég veit það ekki, bara segi svona...
Ég fór að horfa á hundleiðinlegan leik í árbæjarhverfi gærkvöldi. Heimamenn tóku á móti víkingum frá fossvogi. Ég get alveg skilið að leikir séu misskemmtilegir, menn eigi misjafna daga og allt það. Það er bara eitt sem ég skil ekki: Af hverju myndi einhver æða með heilt fótboltalið í leik og segja því að spila varkáran leik og reyna að ná jafntefli? Hvers lags endemis rugl er það? Örugglega finnst sumum þetta heilmikil skynsemi, en ég get ekki skilið þetta. Málið er ekki flókið í mínum huga, til að vinna leik þurfa menn í fyrsta lagi að vera ákveðnir í að gera allt sem þeir geta til að vinna. Það þarf ekki að vera að það takist alltaf, en það tekst varla ef menn leggja sig ekki fullkomlega í það. Menn verða að þekkja andstæðinginn, finna út hvar er helst að finna á honum veikleika, hvernig er best að verjast sóknum hans og skipuleggja orrustuna í samræmi við það. Svo eiga menn bara að vaða í hann! Vinna leikinn, halló!? Heyri ég amen?
Soldið pirruð kannski... :) Heyrumst.

Summer holiday.

2006-06-16T14:21:00.000Z

Síðasti dagur í fríi í bili, ég hef aldrei fengið annað eins skítaveður að díla við í sumarleyfi fyrr. Sennilega gott á mig, alltaf verið sunshine and lollipops þessar fyrstu vikur júní. En lífið er sem betur fer annað og meira en gott veður, annars værum við Íslendingar í vondum málum. Ég er búin að hafa það bara mjög gott, horfa á HM, hjóla, stunda garðyrkju og hver veit hvað. Bara vera til.
Víkingar töpuðu fyrir KR í gær, það var eiginlega mjög gott á þá hvernig sem á það er litið. KRingar misstu Gunnlaug Jónsson af velli í miðjum leik og það er auðvitað tækifæri sem snjallir skipuleggjendur hópleikja gera tilraunir til að nýta sér, það að vera einum fleiri á vellinum. En hvað gerði hinn þéttvaxni, þvoglumælti stjórnandi fossvogsmanna? Ég veit það ekki, ef einhver sá hann gera eitthvað þá má hann láta mig vita. Niðurstaðan? 10 KRingar unnu leikinn og bara verðskuldað.
Tilþrif leiksins áttu án efa varamennirnir sem stunduðu ballettæfingar við endalínu vallarins, áhorfendur héldu að Bolshoj ballettinn væri kominn í bæinn. Enda er þar um aðalgæja félagsins að ræða sem eru af óskiljanlegum ástæðum að slíta spýtunum í varamannaskýlum úrvalsdeildarliða landsins og fá flísar í rassinn og hvaðeina. Burt með bolluna bullandi Gylfason og það sem fyrst og hana nú.

2006-06-06T21:57:00.000Z

Til hamingju með daginn, kóngurinn á afmæli í dag. Ég er enginn sérstakur aðdáandi Bubba, men Herre Gud i himmelen! Hann ekki bara fyllir Laugardalshöllina með þessum afmælistónleikum sínum, heldur eru þeir sýndir í beinni á Stöð2 og útvarpað beint á Bylgjunni. Þvílíkur töffari, tæki ofan hattinn minn ef ég væri með einn. Og þvílíkt form á kallinum.
Nú verður gert örlítið hlé á vinnu, slappað af í nokkra daga. Mikið rosalega verður það gott... vona bara að aðeins birti til fljótlega, eða að það stytti upp? Ekki farið fram á mikið hér.

2006-06-03T09:12:00.000Z

Við erum öll stödd í mismunandi veröld. Allir eiga sína eigin veröld. Það er magnað. Við deilum lífinu með okkar nánustu og sjáum aldrei alla hluti alveg eins, sjáum ekki einu sinni alltaf sömu liti. Jafnvel þó við séum alin upp á sama heimilinu, hjá sömu foreldrunum, höfum gengið í sömu skólana, jafnvel í sömu fötunum... sama myndin blasti alltaf við okkur þegar við komum út úr húsinu að morgni, en við sáum aldrei öll það sama. Því er nauðsynlegt að hlusta, heyra hvað það er sem hinir eru að segja, hvað þeir sjá, þá hlýtur myndin sem við sjáum að verða litríkari og fyllri, ekki satt? Það er þvílík hönnun á bak við sköpun mannsins, ég get aldrei skilið hversu mikla trú fólk hefur sem trúir að sprenging hafi komið þessu öllu af stað... það er bara absúrd hugmynd.

Reykjavíkurborg.

2006-05-31T21:09:00.000Z

Óli F var heitur, Villi sveik hann í tryggðum, Bjössi kom og klobbað' ann... hvað er að gerast? Það eru allir orðnir snarruglaðir í þessari borg held ég.
Lífið er gott, það er nóg að gera og allt í goody. Stundum finnst manni eitthvað vanta, þá rifjar maður upp allt það góða sem maður hefur og nýtur. Klikkar ekki.
Man einhver eftir Tinu Charles? I love to love... Nú er verið að hlusta á Leoncie hér í næsta herbergi, verður þetta eitthvað skrítnara???

2006-05-20T09:47:00.000Z

Sylvía Nótt fallisti, Björn Ingi Bélisti, Eyþór alkóhólisti, Vilhjálmur fúlisti, Sigmar húmoristi. Nú mega menn ráða í textann, þetta er samantekt á dægurmálum Íslands í anda hans sem er konungur stuttu svaranna... :) tekur því sko ekki að eyða fleiri orðum í þetta kjaftæði.
Hins vegar eru alltaf nokkrir snillingar á ferðinni, að þessu sinni eru það fjórir bloggarar, tveir í prentmiðli og tveir á netinu. Í prentmiðlinum eru það þeir Jón Gnarr í pistli sínum í Fréttablaðinu fimmtudaginn 18.maí http://www.visir.is/ExternalData/pdf/fbl/060518.pdf (bls 96) og Guðmundur Steingrímsson í sínum pistli í sama blaði í dag, 20.maí (ekki komið á visir.is þegar þetta er skrifað). Jón Gnarr skrifar um flugvallarþrasið sem stjórnmála- og fjölmiðlamenn virðast aldrei þreytast á. Hann bendir á það sem þeir virðast hreint ekki átta sig á, að það getur ekki á neinn hátt verið forgangsverkefni að færa þennan flugvöll í austur eða vestur. Við höfum bara engan veginn efni á því! Alveg sama hvað lopapeysuliðið sem kennir sig við 101 Rvk vælir og veinar.
Guðmundur bendir á blekkingarvef frjálshyggjumanna í kosningabaráttunni, kallar þá hægri bleika. Fer ekki bráðum að koma að því að þessi helmingur landsmanna sem heldur áfram að kjósa þessa vitleysinga sjái þetta?
Bloggsnillingarnir á netinu eru http://keepitghetto.wordpress.com/ og http://simonsegir.blogspot.com/, bloggin gerast ekki flottari... ég soldið hlutdræg kannski, but, hey?

2006-04-09T17:19:00.000Z

Í dag er algjör letidagur hjá mér, ég nenni bara engu. Kórinn kom fram í úrslitaþættinum í Idol á föstudagskvöldið, það var bara gaman. Snorri tók þetta, hann er ágætur söngvari og spennandi að sjá hvað hann gerir í framhaldinu. Manni finnst ekki hafa heyrst mikið í fyrirrennurum hans, alla vega ekki Kalla Bjarna. Platan hennar Hildar Völu hefur þó heyrst meira.
Það verða tónleikar hjá kórnum í vor, það er alltaf tilhlökkunarefni. Þeir verða auðvitað ekki af sömu stærð og í haust, en örugglega góðir. Í vetur hefur mikil áhersla verið lögð á raddþjálfun, við höfum fengið Heru Björk til að kenna okkur og það skilar sér strax, ekki spurning.
Ég er að hlusta á beina útsendingu frá samkomu í Fíladelfíu meðan ég skrifa þetta, yndisleg tónlist í þar í dag.
Stay cool y´all. :o)

2006-03-30T21:51:00.000Z

Það er loksins búið að troða nýrri tönn í grillið, about time too! Veðrið er loksins farið að batna, nú verður bara hjólað í vinnuna á morgun. Það er mjög skemmtilegur ferðamáti, en það er óneitanlega töluvert háð veðri.
Mamma flytur á mánudaginn í grafarvoginn, það verður mikil breyting fyrir alla. Það er búið að vera í nógu að snúast þessa viku og gríðarlegt álag í vinnunni þar sem veikindi starfsmanna virðast engan endi ætla að taka. Ég stilli upp 35 manns á kvöldin og stend uppi með 26-27 kvöld eftir kvöld. Þetta er nú orðið soldið þreytandi... svona getur þetta ekki gengið mikið lengur, það eru held ég allir starfsmenn búnir að fá einhverja flensu. Ein stelpan var í 2 vikur veik og er núna orðin veik aftur! Það er nú ekkert grín ef allir ætla að fara aðra umferð, herre Gud i himmelen!
Jæja, best að drattast í bólið.

2006-03-24T22:51:00.000Z

Það er ekki að spyrja að því, nú lendir það aftur á mér að blogga um íslenska idolið. Ég læt ekki deigan síga, læt gamminn geysa og sé um málið!
Í kvöld er þemað USA og country tónlist. Ég sé reyndar ekki muninn á þessum tveim þemum, eins og kynnar kvöldsins orðuðu það svo skemmtilega. Þeir eru komnir með annað nýtt: flengiði spaðana í stað gefið gott klapp! Sniðugir strákar.
Hljómsveitin Ísafold er pottþétt þarna á bak við.

Ína byrjar. Þau fá frjálst val, velja úr amerísku pop/rokki. Hún syngur lagið “I wanna dance with somebody.” Hún lítur furðulega út með hárlengingar, en bara fín. Hún er æðisleg stelpan. Flottir taktar. Öryggið algjört, svei mér þá. Mætti kannski vera aðeins meiri mýkt hjá henni á köflum í þessu lagi. Þarna fór hún aðeins út af sporinu í upphækkuninni, varð pínulítið skræk. En, ekki hægt að segja annað en þetta var glæsileg frammistaða. Bubbi er mjög ánægður með hana. Sigga notar orð Simons Cowell og segir að Ína hafi X-faktorinn. Palli fékk big time flash-back þegar hann heyrði lagið, hann er rosalega ánægður. Sidney Winston hvað? segir Einar Bárðarson.

Ragnheiður Sara er næst. Hún er soldið væmin greyið. Hún syngur lagið Ben sem Michael Jackson söng ógleymanlega á árum áður. Ekki finnst mér þetta byrja alveg nógu smart hjá henni, pínulítið óstyrk. Svo kemur hún með smá tæknibrellur, það lyftir þessu upp. Merkilegt nokk, byrjunartónarnir hennar eru ekki alltaf nógu öruggir. Reddar þessu þó með fallegum endi. Siggu fannst þetta stórglæsilegt. Palla fannst pínulítið óöryggi í neðstu tónunum, en finnst það bara allt í lagi. Honum finnst hún hafa tekið mestum breytingum keppenda, hún hefði getað breytst í klassíska kellingu. Einar er sammála mér, ekki alveg nógu gott pitch en allt í lagi.

Bríet Sunna ætlar að syngja You are always on my mind. Það er eins gott að það klikki ekki hjá henni, rosalega fallegt lag. Byrjar vel hjá henni, það hljómar eins og hún sé að syngja frá hjartanu. Ég held hún sé að syngja þetta í of lágum dúr, mér finnst hún ekki alveg njóta sín. Nei, mér finnst þetta bara ekki alveg nógu vel sungið hjá henni.
Bubba fannst þetta ekki nógu gott hjá henni, Siggu ekki heldur. Palli segir að fullkomnun sé ekki til, honum finnst hún hafa sýnt hvað mesta framför keppenda. Sagði hins vegar ekkert um lagið. Einari finnst það eigi að flytja lagið svona, fannst þetta æðislegt hjá henni. Það væri æðislegt fyrir þig að vinna þessa keppni, og æðislegt fyrir þessa keppni ef þú vinnur, sagði Einar.

Snorri með Guns and roses lag. Byrjar á einhverjum öskrum, ekki kann ég nú alveg að meta það dæmi. Flautar í einhverja dómaraflautu og hendir henni svo út í sal. Byrjar að syngja, hljómar alveg hræðilega, hreint út sagt. Alltof háir og skrækir tónar fyrir hann finnst mér, hann er betri þegar það er komið út í keyrsluna þó.
Palli segir hann sé með rödd eins og Axl Rose (kann ekki að skrifa það...). Honum finnst hann þó hafa hermt of mikið eftir honum. Bubba finnst virðingarvert að hann skuli hafa lagt í þetta lag, en finnst hann léleg eftirherma. Siggu finnst hann hafa sett líf í þetta, en of mikil kópíering fyrir hennar smekk. Einar segist eini utangarðsmaðurinn við borðið, ósammála öllum. Þetta fannst honum alveg í lagi.

Önnur umferð, og Ína syngur Something to talk about. Fínt hjá henni, sosum engin gæsahúð. Ég skil ekki af hverju hún syngur þetta í svona lágri tóntegund, bara næ því ekki. Hún ræður ekki við neðstu tónana. Sorry, mér finnst þetta hundleiðinlegt lag.
Siggu fannst þetta of djúpt fyrir hana, fannst hún betri í fyrra laginu en allt í lagi. Palli segir að Blóðbankinn ætti að nota hana í auglýsingu, hún gefi alltaf minnsta kosti einn líter af blóði í hverju lagi. Bubba finnst seinni hluti lagsins hafa verið góður, fyrri hlutinn ekki nógu góður. Einar ánægðu með stelpuna. Hún reynist vera í AB- blóðflokki, hlýtur að vera það alsjaldgæfasta í heiminum á eftir AB+.

Ragnheiður Sara flytur lagið Jolene, með Dolly Parton. Hún er flott með kúrekahattinn og byrjar vel. Þetta hljómar vel, hún nýtur sín vel í þessu lagi. Þetta lag ætti líka að vera í hærri tóntegund held ég. Ég er sammála Palla, hún gerir lögin eftir sínu höfði, kóperar ekki Dolly. Bubba fannst þetta brjálæðislega flott. Sigga sammála Palla. Einar ánægður með hana.

Bríet Sunna syngur lagið Blue. Hún jóðlar flott, gerir þetta bara vel stelpan. Ég held hún sé bara ekta country kelling.
Ógeðslega flott hjá þér segir Bubbi. Palli er ánægður með jóðlið, ég er sammála honum. Sigga segist vera bara öfundsjúk, hún geti ekki jóðlað. Einar segir að hún sé langbest í kvöld.

Þá er það bara Snorri með John Denver lagið, Annies song. Bara fallegt hjá Snorra, virkilega fallegt. Palla fannst þetta gott, sammála honum. Bubbi ánægður með þetta líka, hann segir þetta hafa verið hans allra besta frammistööðu. Sigga heldur að nú hafi hann brætt allar húsmæður bæjarins. Sammála henni. Einar rövlaði eitthvað, heyrði ekki hvað hann sagði, en hann var ánægður með hann.

Ég held að Snorri detti út núna, einfaldlega af því stelpurnar eru allar betri söngvarar en hann. Svo er hann ekki eins likable eins og þær heldur. Sjáum hvað setur, komnar auglýsingar......
Ég verð víst að éta þessa spá oní mig strax, hann er sá fyrsti sem er sendur í sófann, heldur áfram. Ragnheiður Sara er dottin út. Úff, engin leiðinda þakkarræða og yfirlýsing um að hún sé sko ekki búin að syngja sitt síðasta. Rosalega er ég fegin. Svo syngur hún Ben aftur, og miklu betur en áður, það er alltaf þannig, spennan farin úr henni. Fantafín söngkona, við eigum örugglega eftir að heyra meira í henni. Ég spái jólaplötu frá henni í ár.

Kveð í bili, lengsta blogg í heimi.

2006-03-18T23:07:00.000Z

Sæl og glöð og komin heim. Eitt það besta við ferðalög er að koma heim aftur. Sammála?
Nú er herinn loksins að fara, en eins og maðurinn sagði, farið hefur fé fegurra! Skrítinn heimur.
Ég er alveg tóm núna, get ekki blaðrað meira í bili.
Mamma Vestarr.

2006-03-16T23:29:00.000Z

Heia Norge!! Hér ligg ég á hótelherbergi í Oslo eftir ágætan dag hér. Í gær var þriggja landa dagur, eins og vinkona mín hér kallaði það, við flugum snemma morguns til Köben, seinni partinn til Oslo eftir heilmikil hlaup og lítinn svefn og vorum vel þreyttar þegar við komumst hingað. Við þurftum að enda með því að þrasa við einhverja undarlega leigubílstjóra um verð til að komast á hótelið og þá var okkur öllum lokið. Annars er ég að fíla þetta bara vel, maður skilur ótrúlega mikið tungumálin þeirra og það er svo fyndið að horfa á þau öll babla einhvers konar skandinavísku saman hér; Svíar, Finnar og Norðmenn, meira að segja ein hér frá Álandseyjum. Áttum skemmtilegt kvöld á frönsku brasseríi og á einhverjum pöbb á KarlJohansgötu á leiðinni heim. Við íslensku skúturnar erum búnar að hlæja heil ósköp, það er ekki að spyrja að því.
Á morgun er þrammað í skoðunarferð um norska póstmiðstöð og síðan bara í flývemaskínuna til Köben aftur. Við reiknum svo með að fá okkur góðan kvöldverð í þar og fljúgum svo bara heim á laugardagsmorgun og verðum vel sáttar við það.
Ég get nú ekki annað en hrósað ferðafélaga mínum Dagnýju, ég hafði sosum ekki áhyggjur af öðru en að hún væri í lagi, en hún reynist ein alskemmtilegasta kona sem ég hef hitt. Ótrúlega gaman að kynnast fólki eins og henni.
Mamma Vestarr kveður í bili. ;o)

2006-03-10T23:05:00.002Z

Svona bara af því að Idol gagnrýnendurnir sem eru vanir að sitja hér og blogga um íslenska idolið eru illa fjarri góðu gamni, ætla ég að gera mitt besta til að lýsa því sem fyrir augu og eyru ber.

Snorri byrjar, og hann bara fer í gegnum þetta. Who would have thunk? Hann lítur rosalega vel út, flott föt, gott fifties look. Hann hefur notað háa tóna allan tímann, nú söng hann bara á lágu nótunum og olli því bara vel. Gleðin skein ekki beint út úr honum þegar hann söng “Fly me to the moon,” hann er nú soldið freðinn elsku kallinn... En svei mér ef hann er ekki bara sætur þegar hann er búinn að láta klippa hárdruslurnar af!

Ragnheiður Sara syngur um Georgiu hina sætu. Hún er líka eins og hún sé stödd á sjötta áratugnum; málningin og hárgreiðslan, algjört æði! Kjóllinn ekki góður á henni, hún virkar alveg spikfeit í honum. Hvað er með það? En hún syngur þetta vel, það er ekki spurning. Hún virkar þó óvenju andstutt og stressuð. En tæknin kemur sér vel í þessu lagi, hún er alveg að brillera í þessu held ég. Fyndið að sjá Siggu Beinteins dæma hana, Ragnheiður Sara er miklu betri söngkona en hún!
"Þú ert æðisleg!" öskrar Bubbi.

Ingó sukkaði feitt. Ekkert um það að segja annað en það að hann bara swingar ekki.

Ína æðisleg! Hún er geggjuð söngkona, það er bara ekki spurning. Þau gefa henni 10 af 10 mögulegum, ég er sammála því. “Er engin tónlistarstefna á þessari plánetu sem þú getur ekki sungið, ég bara spyr?” segir Palli. Stelpan er alveg æðisleg, svo er hún svo pollróleg yfir þessu öllu, það er alveg ótrúlegt. Simmi og Jói komust þó að því að hún kynni ekkert að rappa! Góðir...
Það hefur enginn heyrt lagið hennar áður, en glæsilega gert hjá henni.

Alexander. Hvað er gæinn gamall? Ef ég vissi ekki betur og sæi hann bara núna í sjónvarpinu að syngja “I´ve got you under my skin” myndi ég giska á ca 40 ára. No kidding. Hann er með hatt eins og afi Ólafur var alltaf með. Syngur þetta ágætlega og er bara mikill performer held ég. Hann leggur sig allan í sönginn, það er skemmtilegt. Bubbi vill að hann létti sig um 7-8 kíló, hvað er þetta með Bubba og kílóin? Er þetta ekki að ganga aðeins of langt?

Bríet Sunna er rosalega flott. Hún syngur hið seiðmagnaða lag "Fever". Endalaust skemmtilegt lag og stelpan gerði þetta mjög vel. Hún er hot. “Þú er GORDJÖS”! sagði Palli.

Ég held að Ingó hljóti að detta út núna, hann er sá eini sem var ekki góður í kvöld, kannski Snorri. Það vantar svo mikið líf í hann.

Og viti menn: Ingó datt út. En, hann var bara með 100 atkvæðum meira en Ragnheiður Sara, hún var sem sagt næstum dottin út í kvöld. Það er ekki einu sinni hægt að bera þau saman sem söngvara þessi tvö.
Læt þetta duga að sinni.

2006-03-06T22:15:00.000Z

Þessa dagana er það ædolið sem tröllríður öllu. Ég hef alla vega ánetjast því, mér finnst svo gaman að fylgjast með þessu. Sérstaklega því ameríska. Ædol me this: hvernig er eiginlega hægt að gubba upp þessum dómum í lok hvers lags? Hvers lags eiginlega.... :) Nei, í alvöru talað, ætti ekki bara að sleppa þessum dómurum þegar áhorfendur eiga að kjósa? Dómararnir reyna að stýra því hvaða söngvara fólk kýs, það er ekkert leyndarmál. Það klikkaði reyndar alveg í íslenska ædolinu síðasta föstudag, þau voru löngu búin að ákveða að sú sem datt út ætti að vinna keppnina en áhorfendur voru á öðru máli. Mér fannst góð hugmynd að koma með eina samsæriskenningu svona í lok þessa mánudags, bara hressandi, ekki satt?
Annars er ég eiginlega sammála þeim amerísku í kvöld, það er Chris sem rokkar! Ekki spurning. Og ég var ekkert svo óánægð með úrslit þess íslenska síðast heldur.

2006-02-23T13:43:00.000Z

Ljótt er að heyra, Chelsea tapaði fyrir Barcelona. Sjálfsmörk og rautt spjald, hvað er að gerast? Ég er svo aldeilis yfir mig bit! Og með yfirbit... Svona gerast kaupin á eyrinni, bót í máli að Eiður spilaði vel.
Ég er óðfluga að jafna mig í andlitinu, í fjarska er auðvelt að misskilja lookið fyrir hitlersskegg, bara til að koma í veg fyrir kjaftasögur þá er ég ekki gengin í neinn nýnasistaflokk og á ekki eftir að gera og er ekki að reyna á nokkurn hátt að líkjast litla, brjálaða Austurríkismanninum. Á mínum vinnustað var búið að ýkja svo sögurnar af byltu minni um helgina að sumir töldu að ég væri illa handleggsbrotin og eitthvað þaðan af verra. Svona magnast sögurnar í meðförum, við þekkjum það, og sei sei já.

2006-02-22T21:36:00.000Z

Oprah blessunin hefur nú fengið sérfræðing í þátt sinn til að fræða okkur um fuglaflensuna. Lýsingin á einkennum er ekki hugguleg, það sem er kannski ennþá verra er að þjóðir heims virðast ekkert hafa gert til að undirbúa þetta. Hvernig stendur á því? Er ekkert skrítið við það að heimsbyggðin með alla sína þekkingu og tækni hefur ekki eytt tíma eða fjármunum í að undirbúa sig fyrir að takast á við þetta. Þetta hljómar eins og pestin muni bara flæða yfir okkur öll á svipaðan hátt og á tímum spænsku veikinnar. Ekki einasta höfum við ekki næg lyf eða tíma til að framleiða þau, við hefðum ekki pláss í sjúkrahúsum eða leiðir til að flytja matvæli milli staða eða ....
Hvað er að gerast? Eru stjórnvöld okkar svona gagntekin af því að græða peninga og moka þeim í vasa sína og vina sinna að þeir láta sig slík smámál engu varða?
Alvarlegt blogg í dag.
Ég er annars að jafna mig í andlitinu eftir að hafa kysst gangstétt frekar harkalega um helgina. Á að vísu eftir að fá tönn í staðinn fyrir þá sem ég skildi eftir, en það stendur til bóta áður en langt um líður. Þakka Guði fyrir að ekki fór verr.

2006-02-19T00:41:00.000Z

Heilir og sælir kæru lesendur. Það verður fröken Silvía Nótt sem fer fyrir okkar hönd í Eurovision í Grikklandi í vor. Ekki er hægt að neita því að það verður spennandi að sjá hvernig henni reiðir af, hún er, ef ekkert annað, ferskur vindur inn í þessa keppni. Ég skal hundur heita ef hún á ekki alla vega eftir að vekja mesta athygli keppenda og öll athygli er góð í þessum bransa, ekki satt?
Hvernig líst mönnum annars á það mál? Látið mig heyra í ykkur.

2006-02-02T22:22:00.000Z

Þá er það orðið ljóst, við enduðum í 7.sæti á EM í handbolta. Kostnaðurinn var einn kjálkabrotinn leikmaður, einn með löskuð rifbein og einn með heilahristing. En mikið rosalega börðust okkar menn, ég skal sko mæta og klappa fyrir þeim ef það verður tekið á móti þeim með viðhöfn þegar þeir koma heim. Og ekki síst fyrir Viggó, ég tek hattinn ofan fyrir honum. Húrra!

2006-01-06T21:25:00.000Z

Já það er fjör.... Það er ekki laust við að geðið hafi verið heldur dapurt í ársbyrjun, en, lof sé Guði, nú er þetta allt á uppleið. Nóg að sýsla bæði í vinnu og heima. Það er hreint með ólíkindum hvað getur rignt í þessu landi, hér lemur rigningin á glugganum hjá mér og það er alltaf jafn notalegt að sitja heima með kertaljósið og hlusta á veðrið. Ekki er síðra að fara í pollagallann og fá sér hressandi göngutúr í slíku veðri. Við fórum í okkar daglegu göngu í kvöld, ég og hundurinn, og þegar ég kom til baka fékk ég þau ummæli að ég væri eins og hverfisvillingurinn í þessari múnderingu. Hverfisvillingurinn? Þá kemur upp í huga minn að það var villingur í öllum hverfum sem ég hef búið í á ævinni, það er ekki spurning. En í minningunni var hins vegar aldrei rigning. Hvað er það? Eternal sunshine... Snjór og allt mögulegt, en aldrei rigning. Ég hef aldrei séð hverfisvilling í pollagalla.

2005-12-21T00:22:00.000Z

Sælt veri allt fólkið! Langt síðan hér hefur verið bloggað, ég var bara alveg búin að gleyma hvað það er gaman að blogga maður. Nú er ég búin að vera að vinna þangað til klukkan er að ganga tólf á kvöldin, orðin þreytt og tuskuleg, en ánægð, því so far gengur allt svo ljómandi vel hjá okkur í póstinum. Ég sem stóð í því í síðasta pistli að ráða jólastarfsmenn hef nú fengið þá alla í hús. Við erum að tala um 50 stykki af unglingum, flest á aldrinum 16-18 ára. Þau sitja nú öll kvöld hjá mér og flokka bréf, æða um með poka eða keyra grindur, bara hvað sem hendi er næst. Mér til þó nokkurrar undrunar og mikillar ánægju reynast þau hinn mesti fjársjóður. Eins og ég sagði í síðasta bloggi, þá snýst þetta auðvitað allt um fólk. "Finnst þér fólk ekki yndislegt?" spurði yndislegur vinur minn þar sem við stóðum og horfðum á hóp af prúðbúnum börnum og foreldrum þeirra ganga í kringum jólatréð um helgina. Auðvitað er það mergurinn málsins, það er bara þannig. Þessir unglingar sem ég hef fengið í jólavinnu er ekki einasta gullfallegur hópur, heldur svo afspyrnuduglegur, kurteis og mjög vinnusamur. Jafnvel þessir típísku 2-3 sem vilja komast af með að vinna sem allra minnst og nota tímann frekar til að heilla stelpurnar eru yndislegir líka, þeir þurfa bara meiri athygli og aðhald. Hver segir svo að æskan lofi ekki góðu?
Best að fara að sofna, stór dagur á morgun.

2005-11-27T11:55:00.000Z

Fólk, það er það sem þetta snýst allt um. Maður hittir þó ótrúlega margt fólk sem hreinlega áttar sig ekkert á því. Dagurinn í gær fór allur í fólk hjá mér, það er ekkert eins gefandi og skemmtilegt. Ég fór með hóp af starfsfólki í Bláa lónið að borða góðan mat og hlusta síðan á Jóhann Inga í nokkra klukkutíma þar sem hann beitti öllum sínum töfrum og heillaði hópinn allan upp úr sokkunum! Maðurinn er auðvitað ekkert annað en predikari, hann hefur náðargjöf sem nýtist honum í sínu starfi sem Peppari Íslands. Ef einhvern vantar pepp þá er hringt í hann. Ef íþróttalandsliðin vantar pepp þá er hringt í hann. Ef starfshópar fyrirtækja vilja pepp þá er hringt í hann. Ef keppendur í Idol stjörnuleit vantar pepp þá er hringt í hann. Af hverju? Maðurinn er einstakur í sínu starfi, við höfum ekki komið upp með annan eins. Við áttum sem sagt alveg stórskemmtilegan og uppörvandi dag.
Eftir það skrapp ég svo með kunningjakonu minni og vini hennar í athyglisvert samkvæmi, engin smáatriði gefin upp hér en kvöldinu var sem sagt eytt í mjög góðum félagsskap.
Nú þarf ég að skreppa í vinnuna, þar er meiningin að breyta svolítið í dag. Spennandi verkefni, svo á morgun verður aðeins meira fært til. Í kvöld er svo samverustund í Fíh salnum kl 20, erfitt að missa af því.

2005-11-17T21:48:00.000Z

Nú er orðið hlýtt úti, svo heyrist mér það eigi að snjóa á sunnudaginn. Það væri bara gargandi snilld, það er svoooo dimmt á þessum tíma þegar enginn snjór er. Ég sé varla til á göngu minni um hverfið, eins gott að ég hef hundinn minn til að leiða mig!
Það eru miklar annir hjá okkur í póstinum, en það er auðvitað bara gaman. Mikil blessun að hafa góð verkefni til að sinna, á morgun er okkar árlegi jólafundur. Þar förum við yfir hernaðaráætlun okkar fyrir vertíðina sem er framundan. Næsta vika fer svo í að ráða jólastarfsmenn, ég þarf að draga inn rúmlega 50 manns í viðbót við þá sem þegar eru. Good times!

2005-11-10T12:31:00.000Z

Hvað er með þennan bloggara hér? Það bara gerist ekkert vikum saman, skömm er að þessu! Það er skemmst frá honum (bloggaranum) að segja, að hann er mjög upptekinn í vinnu þessa dagana, áður en við getum sagt supercalafragialisticexpialadocius verða jólin komin og allt þetta írafár yfirstaðið. Það þýðir í stuttu máli fyrir bloggarann hér, að nú er spýtt í lófana og ráðið inn jólafólk í póstflokkun. Ég ræð ca 80 jólastarfsmenn svo ef þið vitið um einhvern sem getur komið og lagt málinu lið hafið endilega samband við mig, hjá Íslandspósti í síma 580-1230 ef þið hafið ekki mitt prívat númer...
Nú er best að skella sér í hádegismat, later people..

2005-10-17T21:28:00.000Z

Það verður kyrrðarstund í Fríkirkjunni á fimmtudagskvöldið þar sem Gospelkór Rvíkur mun syngja einhver lög. Yfirskrift kvöldsins er held ég "bæn gegn böli," held það verði beðið gegn eiturlyfjabölinu. Ekki veitir af.
Ég fór á samkomuna í Fíh salnum í gærkvöldi, þar sem Halldór Nikulás, a.k.a. Nick fór á kostum að venju. Nú verða bara allir að fara að kíkja þangað því sjón er sögu ríkari.
Annað must þessa dagana er búsáhaldaútsala Lindarinnar á Mýrargötu á laugardaginn. Ég fór síðasta laugardag með Árný og keypti voða fínar súpuskálar og fleira, það er mjög gaman að skoða þetta. Svo skaðar ekki að styrkja Lindina um leið...

2005-10-15T23:54:00.000Z

Er fólk ekki orðið spennt fyrir því að koma á lifandi samkomur? Hvernig væri þá að skella sér á eina slíka í FÍH salnum í Rauðagerði á sunnudagskvöld? Þær eru öll sunnudagskvöld kl 20 og nú ætti allir sem vettlingi geta valdið að kíkja þangað. Það er kominn tími til að lyfta okkur aðeins upp úr ládeyðunni sem hér hefur ríkt undanfarin ár.
Svo mætti bæta því hér við að það verður kyrrðarstund í Fríkirkjunni í Rvík á fimmtudagskvöldið, þar verður "bæn gegn böli," ekki veit ég mikið meira um það en Gospelkór Rvíkur verður þar meðal annarra og syngur nokkur lög. Ekki úr vegi að þramma bara þangað líka? What say you??

2005-10-06T21:20:00.000Z

Ok, ég játa það bara, ég er ekki dugleg að blogga. Kannski hef ég bara ekki meira að segja? Jú jú, nóg get ég talað! Sennilega tala ég svo mikið að ég er alveg orðin tóm á kvöldin. Very likely.
Annars er ekki margt í gangi annað en að vinna, og vinna meira þessa dagana. Vinnudagurinn hefur undanfarið verið ca 10 tímar, stundum 12. Én í gær horfði ég á eina tengdadóttur mína spila handboltaleik við Íslandsmeistara Hauka. Leikurinn var skemmtilegur, alltaf gaman að horfa á kvennahandbolta. Erna tengdadóttir stóð sig líka vel, þær hefðu alveg getað unnið þennan leik ef þær hefðu haft markmanninn sinn, sem lá veik heima. Oh well, kemur!
Jóel nýgifti og hans ektafrú fundu íbúð í kvöld sem þau festu sér á leigu, þau flytja þá 1.nóvember. Það var skiljanlega mikil gleði og hamingja með það, íbúðin ku enda gríðarlega fín og stór og þau eru að springa af tilhlökkun. Héðan fá þau eintómar hamingjuóskir á þessum skemmtilega tíma í lífi sínu.
Jæja, set bara punktinn hér, later people!
P.s. Guðrún Helga, hvernig gengur í nýju vinnunni?

2005-09-25T22:14:00.000Z

Þá er Jollinn minn bara giftur maður. Það er ótrúlegt hvað maður upplifir margskonar tilfinningar við slík tækifæri, mér hefði bara aldrei dottið það í hug. Ég var einmitt að segja við einhvern á dögunum hvað allar þessar tilfinningar kæmu mér endalaust á óvart. Það er eins og ég reikni alltaf með að nú sé maður búinn með flestar upplifanir lífsins og héðan af syndi maður lygnan sjó tilfinningalega. En, nei ónei, það er sko öðru nær. Stöðugt eitthvað nýtt til að upplifa. Og mikið er það nú gleðilegt í sjálfu sér, sennilega verður þetta þannig sama hvað maður lifir lengi.
En brúðkaupið var yndislegt, sonur minn svo fallegur og brúðurin hans líka. Ég er alveg óendanlega stolt móðir.

2005-09-21T22:25:00.000Z

Það styttist óðum í brúðkaupið, undirbúningur í hámarki. Það var æfing í kirkjunni í dag, hún gekk bara vel, ég er viss um að þetta verður mjög fallegt brúðkaup. Ég get alla vega lofað því að það hefur ekki sést flottari brúðgumi heldur en hann sonur minn, hann var að prófa fötin sín í kvöld og hann er bara stórglæsilegur!
Sorrý Ágústa mín, ég hélt það væri öllum augljóst að Símon minn er sá sem á linkinn "Monsablogg" hér til hliðar, fyrir neðan "Frumburðarblogg" sem er bloggið hans Daníels.
Það getur vel verið að ég hringi í þig Árný mín og biðji þig að hjálpa mér að renna upp kjólnum, það er ekki alveg hlaupið að því.
Later people...

2005-09-17T09:27:00.000Z

Tíminn er fljótur að liða, eða eins og maðurinn sagði: "time flyes when you´re having fun!" Lífið er grín og gaman, alltaf eitthvað til að takast á við.
Víkingar komust í gærkvöldi upp í efstu deild, húrra! Þeir unnu Völsung 2-0 í Víkinni við vægast sagt ömurlegar aðstæður til knattspyrnuiðkunar. Völlurinn var eins og lítið stöðuvatn, boltinn spýttist hvert sem verða vildi, leikmenn runnu marga metra ýmist standandi eða liggjandi á maganum. Frumburðurinn skoraði fyrra mark heimamanna úr víti, öruggur eins og ekkert annað kæmi til greina. Það var stolt fjölskylda í stúkunni (og pabbi á hliðarlínunni) sem stökk á fætur og fagnaði. Svo skellti hann sér með sinni heittelskuðu til Stokkhólms í morgun þar sem þau ætla að eyða helginni í boði vinnuveitenda hans. Þau eru flutt í betra húsnæði, það fer vel um þau í Furugrund þar sem þau hafa nú litla holu fyrir sig þar til annað kemur í ljós.
Svo er stóri dagurinn að nálgast hjá örverpinu, brúðkaupið er næsta föstudag og spennan í algleymingi. Undirbúningur gengur vel og enginn farinn á límingunum ennþá, lof sé Guði. :)

2005-09-11T21:04:00.000Z

Ég keyrði norðan yfir heiðar í dag eftir skemmtilegustu helgi sem ég hef átt lengi. Henni var eytt í höfuðstað norðurlands með 7 vinnufélögum, konum úr "ábyrgðadeild" Íslandspósts. Einstaklega skemmtilegar konur og hláturmildar, við hlógum svo mikið að sumir fengu harðsperrur í magann. Vorum allar saman í 3ja herbergja íbúð Póstmannafélagsins, deildum einu baðherbergi og vorum út um allt með snyrtidót og töskur og skó og drasl, en lentum ekki í neinum árekstrum! Náttfatapartí kvölds og morguns, endalaust át og tóm vitleysa. Mikið svakalega var þetta gaman!
Eini mínusinn var að Daníel minn átti stórleik á móti Haukum sem ég missti af, Víkingar eru nokkurn veginn þar með búnir að tryggja sér sæti í úrvalsdeild að ári. Til hamingju með árangurinn Dansi minn og Víkingar allir, well done. Nú fer ég að sofa, verð að vinna upp svefnlétta helgi...

P.s.
Símon minn er bloggari ársins (valið fór fram hér og nú), hvet alla til að kíkja á pistlana hans, þeir eru frábærir.

2005-09-05T04:45:00.000Z

Ótrúlegt en satt, tónleikarnir eru búnir. Stórtónleikar Gospelkórs Rvíkur í Laugardalshöll voru í gærkvöldi og það tókst að fylla húsið af fólki! Eitthvað nálægt 2500 manns lögðu leið sína á laugardagskvöldi til að hlusta á gospeltónlist. Ef einhver hefði sagt mér fyrir 2-3 árum að þetta myndi gerast hefði ég brosað út í annað og hugsað um hvað oft ég hef heyrt hina og þessa spádóma og sýnir og hvað það nú allt heitir. Ég verð að játa að ég er ekki of trúuð á það þegar fólk segir mér slíka hluti. En, fyrrum forstöðumaður og stofnandi Vegarins sagði okkur stundum að hann sæi fyrir sér fólk fylla Laugardalshöllina, hann sagðist sjá fyrir sér mikinn fjölda bíla allt í kring. Skyldi það hafa verið spádómur? Hver veit. Eitt er alveg víst, nú er brotið blað, við sjáum að þetta er hægt. Þetta er engin tilviljun, nú er farin af stað skriða, það á fleira eftir að fylgja í kjölfarið. Biblían segir okkur að Levítarnir, tónlistarmennirnir, fari alltaf fyrstir í orrustu. Það var Guðs ráðstöfun þá og það hefur ekkert breytst. Nú fer þetta að verða spennandi!

Tætum og tryllum

2005-08-19T20:15:00.000Z

Á að leyfa samkynhneigðum að gifta sig í kristnum kirkjum? Er enginn að fá leið á þessu endalausa japli og jamli um sömu hlutina? Ég trúi ekki´mínum eigin eyrum lengur þegar fjölmiðlaspjátrungarnir kalla á Gunnar frænda Þorsteinsson aftur og aftur og aftur og reyna að fá hann til að samþykkja að allar kynhneigðir manna séu jafn þóknanlegar Guði. Ég skil alls ekki af hverju menn geta ekki látið Gunnar og kirkjuna í friði með þetta mál. Það vill enginn heyra hvað hann hefur að segja, menn heyra ekkert sem hann segir í þessum umræðum, ég þori að veðja að enginn þeirra fjölmörgu sem hafa fengið hann í viðtal til sín gætu útskýrt hans málstað. Er það góð fréttamennska? Mér finnst það ekki. Þarna situr þetta, eflaust annars ágæta fólk, og nær alls ekki pointinu. Hættið að reyna að troða fætinum í skóinn, hann bara passar ekki.

P.s. Nú geta allir komið og hlustað á Gospelkór Rvíkur á Ingólfstorgi á morgun milli kl 15 og 16. Tætum og tryllum!!!

Tónleikar!

2005-08-11T21:38:00.000Z

Ég er búin að þeytast um allt á hjólhesti mínum þessa viku og stunda að auki gönguferðir og tai-bo. Mér líður eins og ég sé rosalegt vöðvabúnt, verst að þetta sést alls ekki á mér. Oh well, þetta snýst auðvitað fyrst og fremst um heilsuna, ekki satt? Ótrúlegt hvað maður hefur miklu meiri orku þegar maður er duglegur að eyða henni...
Nú geta aðdáendur gospel tónlistar heldur betur glaðst, því Gospelkór Reykjavíkur verður með stórtónleika í Laugardalshöll 3.september nk. Auðvitað hvet ég alla til að skella sér, miðasala er þegar hafin á concert.is, held ég. Ef það er hálft eins gaman að hlusta á þetta eins og að syngja í kórnum er þetta algjört möst, engin spurning.
Ég er alveg yfir mig rasandi bit á bullinu sem einn þingmaður leyfir sér að æla yfir þjóðina í fjölmiðlum. Þegar maður er farinn að nálgast fimmtugt hefur maður þó marga fjöruna sopið í þeim málum, ekki alltaf mikið vit í því sem þetta fólk lætur hafa eftir sér. En ég held að það sé kominn tími til að menn fari að halda utan um perlurnar sem Pétur Blöndal lætur út úr sér, það er örugglega hægt að gefa út bók með bullinu hans. Ekki síður en Dan Quale á sínum tíma. Skrítið að hugsa til þess að það skuli vera við völd í landinu fólk eins og Pétur, gefur manni nú ekki mjög notalega tilfinningu verð ég að segja. O jæja, kannski er þetta bara alveg rétt hjá Pétri, maður á bara ekkert að vera að reyna að hamast við að veita sér einhver lífsgæði. Hver þarf sosum að hafa síma, sjónvarp, útvarp, bíl, íbúð útaf fyrir sig? Það er þannig sem maður fer að því að lifa af 100 þús krónum á mánuði segir hann. Eiga ekkert og skulda ekkert. Ég er bara að reyna að muna hvað maður kallar svoleiðis fólk.

2005-07-30T20:15:00.000Z

Þá erum við búin með ættarmótið góða á Þingeyri. Það tókst bara mjög vel, allir glaðir með það, nema bróðirinn sem flaug frá Frankafurðu til að koma og stýra veisluhöldunum en sat fastur í Reykjavík í 2 nætur án þess að komast vestur vegna þess að það var ekki hægt að lenda á Ísafirði vegna þoku! Frekar dapurlegt ferðalag það... En, ættarmótið sem sagt sucess. Allir sýndu afkvæmin sín og sögðu sögur af ömmum og öfum og báru saman bækur sínar. Gott að hitta ættingja og átta sig á upprunanum, það hlýtur að skýra ýmislegt.
Jæja,ég var í mat í kvöld og fékk grillaðan skötusel ásamt fleiru á teini, svakalega gott. Verð að fara að halla mér á koddann, enda komin nótt.
Góða nótt.

2005-07-10T22:30:00.000Z

Skrítið hvað lífið hér stjórnast af veðráttunni. Þegar sólin skín á sumrin eru allir úti við, fólk dundar í görðunum sínum, leikur við börnin, fer í gönguferðir, grillar, spjallar við nágrannana. Svo þegar veðrið er eitthvað risjótt sést varla hræða á ferli. Þessi helgi var þannig. Veðrið var alls ekki svo slæmt, alla vega þurrt hér í höfuðborginni, ég er búin að vera á ferðinni á hjólinu og varla mætt nema harðsnúnustu hjólreiðaköppum á ferðum mínum. Þetta vekur endalaust furðu mína. Ég velti fyrir mér hvernig landinn myndi bregðast við ef hryðjuverkamenn réðust á okkur. Held við myndum öll skríða inn í holurnar okkar og ekki fara spönn frá rassi. Draga fyrir gluggana. Nei annars, ég veit það ekki. Segi nú bara svona.
Held ég ætti að halla mér bara á koddann og hætta þessu rugli.
Later yall.

2005-07-04T23:29:00.000Z

Ég var að horfa á einhvern æsilegasta fótboltaleik sem ég hef séð. Víkingar tóku á móti KR í bikarkeppninni, yfirspiluðu þá allan nánast leikinn en tókst ekki að nýta færin sín. Eftir framlengingu, vítaspyrnukeppni og bráðabana unnu KR druslurnar, lygileg hundaheppni sem fylgdi þeim í kvöld. En svona gengur þetta bara, ekki alltaf jólin eins og maðurinn sagði.
Dagurinn annars yndislegur, blíðviðri og allt í lukkunnar velstandi. Ástandið í þessu landi okkar virðist með ólíkindum gott, þ.e. atvinnuástandið, við í Póstmiðstöð erum í stökustu vandræðum með að finna fólk til að vinna. Unga fólkið gerir miklar kröfur, getur sko ekkert verið að vinna til kl 8 á kvöldin eins og ein sagði svo ágætlega áður en hún sagði upp sumarvinnunni: "Ég er sko vön að hitta vini mína klukkan 8 á kvöldin, get ég ekki fengið að hætta aðeins fyrr?"

Jæja, þýðir ekkert að vera að pirra sig á þessum litlu bjánum, bítum á jaxlinn og höldum áfram.

Góða nótt.

2005-06-28T09:57:00.000Z

Fjölmiðlar eru eitt aðalumfjöllunarefni fjölmiðla þessa dagana. Ef ég hef skilið málið rétt, þá eru fjölmiðlar fjórða valdið í samfélaginu af því að þeir eiga að veita stjórnvöldum og opinberum embættismönnum aðhald, upplýsa almenning um það sem hann annars hefði ekki minnstu hugmynd um. Þeir eiga að vera með nefið ofan í öllu, láta okkur vita um allt sem okkur varðar. Við erum svo fegin að þeir gera það, treystum því að þeir séu á vaktinni. En getum við treyst þeim? Í dag finnst manni þegar maður hugsar um fjölmiðla að þeir séu fyrst og fremst að standa vörð um sjálfa sig. Svo eru rógberar og aðrir ógæfumenn sífellt að koma upp með nýjar leiðir til að stunda sinn rógburð og illindi, nú orðið undir merkjum blaðamennsku. Hvað gefur okkur t.d. til kynna að Eiríkur Jónsson sé blaðamaður? Er það sú staðreynd að hann hundeltir þá sem hann heldur að hafi lent í einhverju nógu krassandi í sínu einkalífi til að við hin viljum slefa yfir því og hann haldi vinnunni? Eða sú staðreynd að hann skrifar viðtöl burtséð frá því hvort honum hafi tekist að fá menn til að tala við sig eða ekki? Er það jafnvel það að hann notar útvarpsþætti sína til að lítillækka þá sem honum geðjast ekki persónulega, t.d. fyrrverandi konu sína og barnsmóður?
Ekki veit ég það, en eitt veit ég, ef EJ er blaðamaður þá hef ég alveg misskilið það fag.

2005-06-23T23:14:00.000Z

Víkingar stóðu undir nafni í kvöld í Kópavogsdalnum. Þeir spiluðu eins og karlmenn, voru miklu betri en hundslappir Blikar. Ekki nokkur leið að sjá hvernig Kópavogsbúarnir hafa farið að að ná í öll þessi stig, þeir eru með 7 stiga forskot á Víkinga í 1.deild. Alltaf í boltanum.
Á morgun er kveðjupartý Jóhönnu vinkonu minnar í vinnunni. Við höfum baslað saman hjá Íslandspósti frá árdögum fyrirtækisins. Síðsumars árið 1999 birtist hún í deildinni minni og mér sagt að koma henni inn í málin, hún ætti að verða nýi sap-sérfræðingurinn okkar. Að klukkutíma liðnum höfðum við nánast æviisögu hvor annarrar, þetta small bara einhvern veginn saman. Á þeim 6 árum sem liðin eru síðan hefur vinskapur okkar vaxið, það er ekki oft á lífsleiðinni sem maður eignast slíka vini. Sendi henni mínar bestu óskir um góða tíma í nýju starfi hjá Samskipum, hún á eftir að koma þeim á óvart þar. Go Jóhanna!
Best að fara að halla sér á koddann, vinna í morgunsárið.
Aloha.

2005-06-20T22:45:00.000Z

Fótbolti aftur í kvöld, meiri fótboltasýkin. Það er bara svo gaman að þessu! Við fórum í Mosfellsbæ að horfa á Víkinga spila við Aftureldingu, ekki mikil snilld þar á ferðinni, því miður. Víkingar spiluðu afleitlega, en það gengur vonandi betur næst. Manni finnst eins og þeir nenni þessu varla, erfitt að átta sig á andleysinu sem virðist ríkja í hópnum. Vona að þeir finni samt út úr þessu.
Gott að komast í bað og ból þegar dagur er að kvöldi kominn, ætla að reyna að sofna sem fyrst og hjóla í vinnu að morgni. Svo er grillveisla hjá foreldrum Ernu D á morgun, daman á afmæli og það er boðið til veislu í Birkigrundinni. Hlökkum til. :o)

Góða nótt.

2005-06-19T22:03:00.000Z

Til hamingju með daginn allir! Í 90 ár hafa íslenskar konur haft kosningarétt, hugsa sér það, enn er til fólk sem lifði þann tíma þegar konur fengu ekki að kjósa. Við fögnum að sjálfsögðu öllu jafnrétti meðal manna, hverju nafni sem þau nefnast.
Það var ekki mikið jafnrétti á Leiknisvelli í kvöld, þangað komu KR-ingar með ´föruneyti og pökkuðu heimamönnum saman í lítinn kassa. Unnu 6-0. Það var gaman að koma í ghettoið, heimamenn bara sprækir og reyndar óheppnir að leikurinn fór í þessa átt. Svo rigndi alveg svakalega.
Jæja, best að drattast í rúmið, vinnudagur á morgun.

2005-06-14T22:24:00.000Z

Mikill blíðviðrisdagur að kveldi kominn, tími kominn til að ganga til náða. Það eina sem er erfitt við þessa fallegu björtu sumardaga er að sofa fram yfir kl 5 að morgni þegar sólin byrjar að skína.
Annars heldur pósturinn áfram að streyma í Póstmiðstöðina, allt gengur sinn gang þó helmingur landsmanna sé kominn í sumarfrí, merkilegt nokk.
Andleysið er algjört þessa stundina, leggjum árar í bát og bjóðum góða nótt.

2005-06-13T22:49:00.000Z

Hér á hinu illræmda suðvesturhorni hefur veðrið leikið við okkur í dag. Ég fór í vinnuna eftir 2ja vikna frí, það var ekki laust við að það tæki svolítið á. Svo kláruðum við Jolli hellulögnina hér í kvöld, þá er henni endanlega lokið í bakgarðinum. Allt annað að sjá ´etta mar!
Frumburðurinn kom með nýju fótboltaskóna sína, þeir eru gjörsamlega geggjaðir! Sá fær að standa sig í þeim, maður lifandi.
Nú er skrokkurinn orðinn lúinn eftir allan dugnaðinn, best að reyna fara að sofna, ekki veitir af fyrir hjólreiðar morgunsins.
Sofið rótt....zzzzzzzzzzzzzz

2005-06-12T10:04:00.000Z

Fór á skóútsöluna og nældi mér í 2 pör af skóm fyrir skít á priki. Það er alltaf góð tilfinning að kaupa 10 þús króna skó fyrir ca 10% af upprunalega uppsettu okurverði. Mér finnst ég einhvern veginn hafa leikið á einhvern?
Hér var hellulagt í gær, yngsti snillingurinn minn fór í málið með mér og það gekk svo ljómandi vel. Nú verður lögð lokahönd á það verk í dag, mikið gott þegar það er búið. Þá er nánast ekkert eftir annað en að huga að gróðri, mikið skemmtilegri vinna það.
Hér voru allir synirnir í mat í gær, grillað svínakjöt, svo birtist Óli og borðaði óvænt með okkur. Símon fór að spila með Miseríinu og Daníel að hlusta, en hingað komu svo nágrannarnir og við sátum öll úti að spjalla þar til það var orðið of seint að ná að fara og hlusta. Oh well, can´t win ´em all!
Best að fá sér kaffi og rist áður en hafist verður handa við að klára hellulögnina, ekki veitir af!
Later.

2005-06-11T10:38:00.000Z

Laugardagsmorgunn, kaffi, ristað brauð og rólegheit. Kláraði að mála ruslatunnuskýlið í gær, dugleg stelpa. Gutti fékk að vísu flogakast á stéttinni á meðan ég málaði, aumingja kallinn. Jóel var sem betur fer heima, ég á erfitt með mig þegar þetta skeður. En hundurinn var fljótur að jafna sig, var jafngóður eftir ca 2 mínútur, þetta virðist ekki hafa verið mjög alvarlegt kast. Svo var hann ekki eins þreyttur eftir það, eiginlega bara mjög sprækur. Vonum bara það besta, maður getur víst ekkert stjórnað þessu.
Víkingar unnu HK í gríðarlegum baráttuleik, slagur í nærri 100 mínútur (dómarinn ætlaði aldrei að flauta leikinn af!) um hvern bolta. Sérstaklega ánægjulegt að sigra í svoleiðis leik, það hefði getað dottið hvorum megin sem er. Daníel fær lægstu einkunnina í liðinu á vikingur.net, mér finnst það nú full harkalegt, en það eru gerðar miklar kröfur til hans og það er ekki slæmt.
Ég er að hugsa um að drífa mig á skóútsölu í Faxafeninu, það væri ekki slæmt að ná sér í góða skó fyrir sáralítinn pening. Hvet alla sem vettlingi geta valdið að kíkja á það!
Bless í bili.

Gúmoren!

2005-06-07T19:56:00.000Z

Held það sé kominn tími til að krota hér eitthvað nýtt. Skelfileg leti ráðið ríkjum í þessum málum, skömm að segja frá því. Hér hef ég verið í fríi heima, var síðustu viku og verð þessa líka, þvílík dýrð og dásemd! Síðasta vika fór auðvitað mest í að vera úti í sólinni, grilla og allt sem góða veðrinu fylgir. Til allrar hamingju fór svo aðeins að rigna í þessari viku, þá fór ég að verða duglegri. Í dag er ég t.d. búin að fara og ná í 4 poka af sandi, 40 kg stykkið, drusla þeim út í garð og leggja slatta af hellum! Svo fór ég í Sorpu með slatta af rusli sem ég hef safnað mér af miklum myndarskap. Keypti mér svo forláta spegil á stofuvegg, vantaði alltaf á einn vegg hér. Festi herlegheitin líka upp. Inn á milli horfði ég svo á eina mynd með Daníeli hér í eftirmiðdaginn, Wimbledon, bara nokkuð skemmtileg ræma. Mér tókst líka að sækja Jóel, koma við og klára skúringarnar, eyða klukkutíma úti með hundinn og nú er ég sko sest í sófann og hreyfi mig ekki meira í kvöld! Ætla að horfa á Everwood og svo einhverja mynd sem ég er með á video.
Nú verð ég sko duglegri að blogga í framhaldinu, lofa því.

2005-05-21T23:36:00.000Z

Tónleikarnir búnir, í bili, but hey, there´s more to come! Mikill spenningur yfir hugsanlegum tónleikum í september. Sjáum nú til með það allt saman. Alla vega voru þessir tónleikar yndislegir og það eru forréttindi að tilheyra þessum hópi.
Ég fór í árlega póstgöngu í dag, þá ganga 2-300 manns einhverja gamla póstleið, grilla pylsur og skemmtilegheit. Við gengum eftir fjörunni í Borgarfirði, undir Hafnarfjalli, og þvílíkt rok og kuldi! Þvílík hraustmenni sem við erum! Við komumst til byggða, lof sé Guði. Þetta var skemmtilegt, eins og alltaf. Svo erum við búin að skemmta okkur hér vel í kvöld við pizzuát og Eurovision, bara ánægð með að sú gríska skyldi vinna fyrst Selma var ekki með. Mér finnst svona eftir á að hyggja alveg drepfyndið að við Íslendingar skyldum ekki sjá þann möguleika að hún kæmist ekki upp úr forkeppninni, það hvarflaði alla vega ekki að mér fyrr en þau áttu bara eftir að tilkynna 2 lönd, að það gæti komið til. Við erum svo sniðugt fólk.

ALLIR MEÐ!

2005-05-16T23:26:00.000Z

Jæja gott fólk, nú er liðinn mánuður frá síðasta bloggi hér, how time flys man! Í kvöld voru fyrri tónleikar Gospelkórs Reykjavíkur, þeir tókust framar vonum, þetta var upplifun. Salurinn var kjaftfullur og ALLIR með! Þvílík stemning! Meira að segja ráðherrann á fremsta bekk skemmti sér bara prýðilega, veifaði höndum eins og allir hinir. Það er engu logið þó ég segi að þessir tónleikar eru trúarleg upplifun. Yndislegt.
Ég er líka búin að klára áfangann í félagsfræði sem ég skráði mig í í vetur, lokaprófið var á föstudaginn og ég fékk 9,4, lokaeinkunninn mín er þá 9. Dugleg stelpa.
Jæja, best að fara að festa svefn, seinni tónleikarnir annað kvöld og ég þarf að mæta í vinnu í fyrramálið.
Góða nótt.

Nýtt útlit.

2005-04-17T13:26:00.000Z

Þá hefur hönnuðurinn fengið að leika lausum hala hér á þessari síðu. Útlitið er bara nokkuð svalt, sýnist mér, þó ekki endanlega fullklárað. Nú er hins vegar tímanum aðallega eytt í að lesa félagsfræði, best að reyna að klára þetta próf með einhverri reisn, skárra væri það nú. Það er von mín og trú að nú sé að stytta upp utandyra, hvaðan kemur allt þetta vatn eiginlega? Það er búið að rigna eldi og brennisteini, hundum og köttum og öllu sem manni getur dottið í hug. Mál að linni.
Nú er Robert Plant væntanlegur til landsins í vikunni, tónleikar um næstu helgi, gæti verið gaman að skella sér á þá, það eru víst enn til miðar í stæðum.
Verum góð við hvert annað, eigum rólegan, friðsamlegan sunnudag.

2005-04-10T10:09:00.000Z

Yndislegur sunnudagsmorgunn, finnst ekki fleirum en mér þeir yndislegir? Fá sér kaffi og ristað brauð með osti, vera í náttfötununum að lesa blöðin, horfa á sjónvarpið, eiga allan heiminn!
Ég rakst á umfjöllun um samtök fyrir "skuldafíkla" í nýjasta hefti Birtu. Hvet alla til að lesa þetta. Þar er m.a. reynslusaga sem ég hygg að æði margir sem komnir eru af unglingsaldri í dag þekkja. Hvernig viðkomandi eignaðist fyrsta kreditkortið bara til að fá afslátt af utanlandsferð, byrjaði strax að skulda alla neyslu. Þegar kom að mánaðamótum átti kortafyrirtækið öll launin, o.s.frv. Greinarhöfundur (ekki nafngreindur...) segist hafa talað við þýskan mann sem hér var staddur og líst fyrir honum hvernig landinn hagar sínum fjármálum, t.d. að algengt væri að fólk tæki lán í einum banka til að greiða lán í öðrum. Þessu átti sá þýski erfitt með að trúa því slíkt varðaði við lög í hans heimalandi! Væri ekki bara gustuk að setja lög sem gerðu fólki erfiðara að lenda í þessum ógöngum öllum? Ég veit ekki, en hitt veit ég að við erum ekki nógu heilbrigð, almennt talað, í okkar fjármálahugsun. Endilega lesiði greinina og kaupið svo bókina hans Ingólfs H Ingólfssonar, "Þú átt nóg af peningum ...þú þarft bara að finna þá." Þar segir hann meðal annars að fjáhagsvandi sé hegðunarvandi.
Eigum svo góðan sunnudag, nýtum hann til þess sem skyldan býður eða hugurinn girnist, hvort tveggja er gott. Písát.

Kynvillingar?

2005-04-08T21:34:00.000Z

Jæja, í gær hitnaði heldur betur í kolunum þegar Gunnar frændi Þorsteinsson mætti síra Bjarna í sjónvarpsumræðum um samkynhneigð. Tilefnið lá ekki í augum uppi, trúlega þörf stjórnenda til að blása lífi í þáttinn sinn, það gerist ekkert bitastætt þessa dagana eftir að nýráðinn fréttastjóri Rúv hætti við djobbið og fékk fyrir væna fúlgu í starfslokasamning.
Leikurinn hófst á því að síra Bjarni hellti úr skálum reiði sinnar yfir "andstæðinginn," sem virtist undrandi á reiðinni sem greinilega sauð í blóði sírans. Klerkur enda þekkt prúðmenni í okkar samfélagi. Umræðurnar snerust um það hvort frændi Gunnar væri ekki örugglega ofstækismaður sem hataði homma og hefði komið mörgum þeirra í gröfina með hörðum og vanhugsuðum ummælum sínum. Undrun Gunnars minnkaði ekki þegar í ljós kom að hann var ekki kominn til að etja kappi við sírann einan, nei ónei, í liði með honum voru ekki aðeins annar heldur báðir stjórnendur þáttarins. Það hlýtur öllu metnaðarfullu fjölmiðlafólki að vera ljóst að meiri heiður getur engum í þeirri grein hlotnast hér á landi en þeim sem leggur Gunnar Þorsteinsson að velli í umræðum.
Hvort Páll postuli sagði að menn skyldu ekki brenna í losta til fullorðinna karla eða ungra drengja, hvort menn eiga að setja ritningarnar í sögulegt samhengi, hvort konur eiga að þegja á safnaðarsamkomum (mega þær þá tala í kaffinu á eftir?), er þetta það sem allt snýst um? Hvað er að marka ritningarnar og á hverju byggjum við trú okkar? Þurfum við að mennta okkur í sagnfræði og finna út sögulegt samhengi hlutanna til að skilja það sem ritningarnar segja?
Eitt er víst, Guð er almáttugur og lætur sér annt um alla sína sköpun.

2005-03-23T17:49:00.000Z

Mikið lifandis skelfing og ósköp! Allt að verða vitlaust. Ég hef grun um að það hafi verið grafíski hönnuðurinn okkar Tindsælinga sem hér vældi af leiðindum yfir útlitinu hjá mér (eða á mér?). Ég býð honum hér með að kíkja á málið, koma með tillögur að úrbótum hið allra fyrsta. Ekki viljum við nú fæla frá báða lesendurna vegna þess að útlitið er svo leiðinlegt, ónei ónei. Vertu bara velkominn með allar þínar frómustu hugmyndir og láttu vaða á súðum! Málið verður hiklaust skoðað. U can take that to the bank.

Reykjavíkurflugvöllur.

2005-03-06T12:43:00.000Z

Mikið skelfing er ég orðin leið á þessum umræðum um Reykjavíkurflugvöll. Sömu mennirnir koma saman í sömu sjónvarps- og útvarpsþáttunum, árið út og inn undanfarin ár og rökræða um það hvort völlurinn á að fara eða vera. Mér leiðist ekki þegar menn skiptast á skoðunum um hluti sem skipta okkur öll máli, nauðsynlegt að láta ráðamenn svara fyrir ákvarðanir sínar. Nauðsynlegt að láta sem flestar raddir heyrast. En í þessu máli sitja alltaf sömu mennirnir á sunnudögum í umræðum á 2 sjónvarpsstöðvum, drukku of marga bjóra á pöbbunum í 101 á laugardagskvöldið, og ergja sig yfir því að fá ekki að byggja í Vatnsmýrinni. Þröngsýni þessarra 101 greyja er farin að verða frekar þreytt, afturhaldsseggir af verstu gerð. Við skulum öll þjappa okkur í kringum höfnina og tjörnina, alls ekki vera að búa til "sveitaborg" eða búa til fleiri hverfi. Við höfum svo fínt hverfi í 101, hvað eru menn að æða upp að Rauðavatni, Úlfarsfelli, Rjúpnahæð? Eru menn með réttu ráði? Ég legg til að þessi grey fari að taka lopahúfurnar ofan, hoppa upp í strætó og fara í sight seeing tour um okkar fallegu borg. Hér í Breiðholti, Grafarvogi og Grafarholti býr stór hluti Reykvíkinga sem hefur ekki nokkurn áhuga á því að flytja niður í Kvos. Er ekki mál að linni? Ef ég heyri Hallgrím Helgason tala einu sinni enn um "leiðindahverfin" sem er boðið upp á hér í austurhluta borgarinnar þá gríp ég til aðgerða. Skrifa jafnvel harðort bréf. Þá mega menn fara að vara sig!

2005-03-02T20:47:00.000Z

It´s been a while. Það er voða gaman að blogga, en vinnst ekki alltaf tími til að setjast niður og láta vaða. Hvet alla til að lesa bloggin hjá sonum mínum, tveir þeir eldri blogga eins og óðir, alveg stórskemmtileg lesning.
Meira síðar, ætla að kíkja á ameríska idolið. Idol fan no1 hér.

2005-02-15T20:07:00.000Z

Árið 1975 (ef ég man rétt) leit dagsins ljós "nýtt óháð dagblað." Þetta var spennandi, sú sem þetta skrifar var þá í menntaskóla, það var haust, ég var að vinna í bóksölunni, veturinn að byrja og fullorðna lífið framundan. Blaðið lofaði góðu, var svo ferskt við hliðina á Tímanum, Þjóðviljanum, Alþýðublaðinu og Mogganum, var óháð þessum gömlu flokkum. Ekki leið þó langur tími áður en í ljós kom að blaðið var óháð fleiru en þessum leiðinda stjórnmálaflokkum. Það reyndist óháð öllu sem kalla mætti siðferðislega ásættanleg fréttamennska, fjallaði mjög "frjálslega" um menn og málefni sem efst voru á baugi í þá daga. Það vill svo til að sú ömurlega fréttamennska (ef það er kallað það) sem þar tíðkaðist snerti persónulega mig og mína nánustu og því birtist kannski einhver biturleiki í þessum pistli. En það er aukaatriði, það sem er verst í þessu máli er að frá þeim tíma höfum við flest þroskast og vitkast (mismikið kannski...) en dagblaðið sem fæddist þetta haust fyrir 30 árum hefur ekkert breyst! Í gegnum tíðina hefur það skipt um eigendur, nafnið nokkrum sinnum fengið ný blæbrigði, en í dag eru skrif þess lélegri en fyrir 30 árum ef eitthvað er.
Ég á enn fyrsta eintakið af þessu einhvers staðar í geymslunni, það fer í ruslið ef ég finn það. Það hét Dagblaðið fyrir 30 árum, heitir DV í dag.

2005-02-12T10:30:00.000Z

Heilir og sælir lesendur góðir, báðir tveir. Við fórum að syngja fyrir ameríkanana á vellinum í gær, það var hin áhugaverðasta ferð fyrir margra hluta sakir. Ballið byrjaði í hliðinu, þar sem 20+ söngvarar í GR þurftu að troða sér inn í skýli íslenskra lögreglumanna (sem rúmar með góðu móti ca 5 gesti), gera grein fyrir persónu sinni með greiðslukortum eða ökuskírteinum. Fylla síðan út lítinn gulan miða, sem er heldur minni en sá sem þú færð þegar þú hefur rennt kortinu þínu í posa, passa þann miða eins og sjáöldur augnanna, því ef hann týndist yrði okkur ekki sleppt út úr hliðinu aftur! Yrðum dæmd til að ráfa um auðnir miðnesheiðarinnar ellegar stræti herstöðvarinnar og hlusta á ameríkönsku allt til enda. Hvílík örlög. Svo kom í ljós að tveir kórfélagar voru ekki með neinar sannanir fyrir því að þeir voru ekki hryðjuverkamenn frá suðaustlægari löndum, en af því að það lá vel á íslenskum þjónum laganna þann daginn voru þessir aðilar ekki fangelsaðir, það mál endaði reyndar þannig að gestgjafi okkar, kirkjunnar þjónn á velli Keflavíkur, gekk í málið og heimti þau úr skýlinu svo þeir gætu sungið með okkur. Við reyndumst svo þrefalda fjölda samkomugesta, en það sýndi sig að það er ekki allt mælt í fjölda, nei ónei. Lífið í þessum fáu hræðum sem við sungum fyrir var þvílíkt að við vorum ekki komin niður á jörðina þegar við mættum á æfingu í morgun. Vorum enn að hrópa klappa og hoppa. Einn gesta sem við tókum með okkur úr höfuðborginni hafði á orði að hann hefði aldrei séð slíkt líf í kórnum fyrr, hann er búinn að fylgjast með flestum okkar uppákomum. Þannig að ferðin var hin besta þegar upp var staðið, losaði heilmikið um kórfélaga. Fyrir utan að samkoman var mjög lifandi og gefandi, amerísk kona predikaði, heitir Veronica Pope, hún flutti mál sitt af mikilli festu öryggi og trúarhita.
Læt þetta duga í bili.

bolla bolla...

2005-02-06T21:25:00.000Z

Bolludagur á morgun, hann hefur alltaf verið í uppáhaldi hjá mér, kannski tengt nafninu mínu? Ég veit það ekki. Hér er siður að klára bolludaginn nánast á sunnudegi, allir út um allt á mánudögum. Þó er alltaf einhver afgangur, vona að kátir piltar stingi sér í ísskápinn á morgun og klári hann.
Veðrið er svo ljótt, nú er maður þakklátur að þurfa ekki að fara út úr húsi. Héðan fór fólk að skælast í bíó í kvövövöld, mér óskiljanlegt. Maður heyrir ekkert í veðrinu á gluggum þar, svo þarf maður í ofanálag að fara inn og út úr húsum! Vona að myndin sé þess virði. Er það sennilega.
Farin í bað, heyrumst síðar gott fólk.

Lördag aften.

2005-02-05T23:09:00.000Z

Það hefur lítið farið fyrir bloggun á þessari síðu undanfarið, einfaldlega ekki unnist tími til þess arna. Fyrir hugsanlega lesendur mína mæli ég með að þeir kíki á síður Símons og Daníels, simonsegir.blogspot.com og dannihjalta.blogspot.com. Þeir eru sniðugir strákarnir.
Hér er búið að renna niður pizzunni og menn sestir niður við dvd myndir, cellular held ég að verði fyrri mynd kvöldsin. Það ku vera spennumynd hin besta, sjáum til hvað þessi hér hangir lengi uppi yfir því...
I bid u good night.

2005-01-23T14:45:00.000Z

Miðjumaðurinn og hans ektakvinna.

2005-01-23T14:42:00.000Z

Voffi í snjónum

2005-01-19T11:35:00.000Z

Kvefdrullan reyndist vera einhver flensa, hér hef ég nánast legið eins og slumma síðan síðast. Það hlýtur að líða hjá. Alla vega er alveg klárt að ef þetta væru stærstu vandamál lífsins, þá værum við í góðum málum.
Það átti að snjóa meira í dag, það hefur nú sem betur fer lítið gerst í því máli.
Hér ríkir andleg þurrð, hef ekki neitt að segja, er alveg gjörsamlega galtóm...

2005-01-17T22:11:00.000Z

Þá á mamma gamla afmæli í dag, orðin 74 ára. Við systur heimsóttum hana í dag, hún leit vel út og var bara hress og kát. Svo á utanríkisráðherra hæstvirtur afmæli líka, hef nú aldrei komið auga á hvað þau tvö eiga sameiginlegt annað en afmælisdaginn. Sem betur fer! Ekki vildi ég eiga mömmu sem væri lík þeim manni, sorry.Það er bara einn maður á lista yfir fræga fólkið sem á afmæli í dag sem er fæddur sama ár og mamma, það er James Earl Jones. Ekki amalegt... Svo er fullt af góðu fólki og líka ekki svo góðu; Muhammed Ali, Jim Carrey og Al Capone. En til hamingju með daginn mútta!
Einhver kvefdrulla komin í mann, sofna bara snemma núna, hlýtur að líða hjá. I bid you good night.

Kósí kvöld.

2005-01-13T18:22:00.001Z

Spáð aftakaveðri, held ég, upplagt að kveikja á kertum og slaka á, lesa bók, horfa á mynd eða eitthvað í þeim dúr. Fór í ræktina í dag, tók aðeins áðí, duglega stelpa. Það virkaði frekar hvetjandi að slökkvilið höfuðborgarinnar átti nokkra fulltrúi á staðnum sem lyftu lóðum af miklum móð. Einhvern veginn leið tíminn frekar hratt á hlaupabrettinu...
Kjarasamningar í fullum gangi í fyrirtækinu, reyndar er enginn gangur í þeim. Deilan fer sennilega fljótlega til sáttasemjara, spyrjum að leikslokum. Ekki yrði ég hissa þó verkfall yrði boðað....

Í takt við tímann.

2005-01-12T23:30:00.000Z

Ég fór að sjá Stuðmannamyndina, það er skemmst frá því að segja að ég hló eins og fífl. Mér finnst þessir kallar bara ótrúlega fyndnir og hugmyndaríkir. Nýöldin er bara tekin í bakaríið, okkur leiddist það ekki, ég fór sko með öllum kórnum mínum. Ég held allir hafi skemmt sér vel, það var auðvitað heilmikil stemning að fara svona öll saman, við heyrðum í okkur í einstökum lögum þar sem við sungum bakraddir. Það var nú ekki notað mikið af þeim, en það var gaman að syngja þær og hljómar bara vel það sem heyrist.
Hér voru tveir synir mínir yndislegir í kvöld, með sínar heittelskuðu, alltaf gaman að sjá þau öll. Mín bara orðin sybbin, komið langt fram yfir svefntíma. Nú skelli ég mér í spriklið á morgun, það er hressandi að taka aðeins á því. Allir í gymmið!

Jafnvægi.

2005-01-11T19:18:00.000Z

Ég var búin að skrifa heilan pistil hér sem glataðist allur. Hef ekki hugmynd um af hverju.
Ég hlustaði á útvarp í dag, það var verið að tala um að ef við pössuðum ekki að sofa nóg, þá myndum við eiga erfiðara með að passa þyngdina. Óreglulegur svefn er fitandi. Svo var kona í sjónvarpinu eftir fréttir að tala um svefnvandamál fólks. Það er algengt að konur á miðjum aldri eigi erfitt með svefn, ástæðan ókunn. Enginn munur á félagslegri stöðu kvenna, hvort þær stunda líkamsrækt, hvort þær eru giftar o.s.frv. Ráðin eru að passa mataræðið, hreyfinguna, og almennt reglusamt líferni. Niðurstaðan er sú að til að lifa heilbrigðu lífi þarf common sense. En, eins og spakur maður sagði, þá er það víst ekki svo common. Lykilorðið virðist vera: Jafnvægi.
Ok, farin að sjá Stuðmannamyndina, kvikmyndagagnrýni kemur hér að því loknu.

2005-01-09T17:59:00.000Z

Það er svo margt skrítið. Svo margt sem fer öðruvísi en maður ætlar. Sennilega fer flest öðruvísi en maður hefði spáð fyrir um. Það er eitt af því sem gerir lífið skemmtilegt, held ég. Ef allt væri fyrirsjáanlegt væri nú lítið gaman að þessu.
Nú stendur til að stunda ræktina í Hreyfingu í tvær vikur í boði Susan. Hún gaf mér gjafabréf sem ég ætla heldur betur að nota, get ekki beðið eftir að taka aðeins á því. Fátt betra en að puða soldið og svitna, fara svo í gott bað. Gott fyrir sálina og líkamann og ég mæli eindregið með því fyrir allar þær letihrúgur sem hugsanlega lesa þennan texta. Ef ekki í ræktina, þá í göngutúr alla daga vikunnar, það er engin afsökun fyrir því að gera það ekki ef maður hefur sæmilega heilsu. Allt sem þarf er góður hlífðarfatnaður, slatti af honum auðvitað, og þramma af stað! Koma so!

Myndvæðing hafin.

2005-01-08T19:02:00.000Z

Lovy dovy. Frumburðurinn og hans heittelskaða. Tekið á jóladag í Tindó.

Annar í ammæli...(lag: stella í orlofi)

2005-01-04T21:07:00.000Z

Jæja,
þessi líka svakalega afmælisveisla hjá Ernu Soffíu í gær! Hún var 25 ára og það komu 200 manns í veisluna. Einhver spurði mig í dag hvað hún ætlaði að gera þegar hún yrði fimmtug. Réttlætanleg spurning, en það er ég viss um að þeim dettur eitthvað skemmtilegt í hug. Það er auðvitað alltaf gaman að hitta fólk, hvað værum við að þvælast hér um ef það væri ekki fyrir eitthvað fólk? Við getum engan veginn verið án foreldra, barna, vina, nefndu það, þetta snýst allt um þessa asna sem maður skilur ekki hvernig urðu á vegi manns til að byrja með! (Bara svona létt grín, vona að enginn taki þetta alvarlega.)
Kvöldið endaði svo frekar skemmtilega hjá mér, ég kom heim, seint og um síðir, með slatta af afmælispökkum sem ég opnaði. Þvílíkar gjafir maður, ég fékk geggjað sjal frá Ann Taylor, æðislegar snyrtivörur frá Clarins, diskinn hennar Ellenar Kristjáns, svo eitthvað sé nefnt. Sendi enn og aftur þakkir til þeirra sem hlut áttu að máli, ég er gjörsamlega orðlaus yfir flottheitunum. (Kannski ekki alveg orðlaus, en mjög undrandi.)
En, öllu gríni slepptu, einn son minn vantar stúdíóíbúð til leigu, eða gott herbergi með góðri aðstöðu. Endilega látið mig vita ef þið fréttið af einhverju.
Jæja, best að drattast snemma í rúmið, hundurinn liggur hér á gólfinu og rekur við, ekki mjög notaleg lyktin af honum. Hann á nú afmæli í næsta mánuði og spurning að gefa honum eitthvað sem lyktar vel?
Nei, ég segi nú svona.

Ammli.

2005-01-03T18:12:00.000Z

Ég á afmæl´ í dag... Þakka fyrir góðar óskir frá frumburðinum hér á netinu, tákn tímanna að senda mömmu sinni afmæliskveðju á netinu í staðinn fyrir að kyssa hana eða hringja... Thats 2005 for you!!
Strákurinn er snjall að blogga, hann bloggar hér:http://www.dannihjalta.blogspot.com, endilega kíkið á það, skemmtilegur strákurinn og á ekki langt að sækja það.

Hef ekki meiri tíma í bili fyrir bloggun, things to do, places to go, people to meet, eða eitthvað í þá áttina.
Bless í bili.

Nú er úti veður vott...

2004-12-30T11:30:00.000Z

Miðvikudagurinn var aldeilis busy, það var gott að leggjast á koddann í gærkvöldi. Okkur gekk vel í Íslandi í bítið, ótrúlegt hvað við litum vel út svona nývöknuð! Svo var partý í gærkvöldi, kínamatur og fínerí. Árný átti líka afmæli í gær og ég kíkti þangað, það er alltaf svo jólalegt hjá þeim.
Það er svo fallegt að horfa út um gluggann hér, birtan er u.þ.b. að sigra myrkrið þessa stundina, svakalega er veðrið búið að vera undarlegt undanfarnar vikur. Ekki lítur það vel út fyrir skotglaða borgarbúa, útlit fyrir að tugþúsundirnar fari fyrir lítið upp í snjómuggu eða fjúki vestur á snæfellsnes. Það njóta þeirra þá kannski einhverjir þar, hver veit?
Heyrði að Kiefer Sutherland væri staddur hér, hlakka til að heyra sögurnar af pöbbunum, af kvenfólkinu sem reyndi að heilla kappann. Ekki hægt annað að brosa út í annað þó þetta sé auðvitað frekar sorglegt.
Jæja, hlökkum til að kveðja gamalt og annars ágætt ár, til þess að heilsa nýju, því nýtt ár þýðir ný tækifæri, ekki satt?

Þriðji dagur jóla.

2004-12-27T21:50:00.000Z

Lítið verið bloggað hér undanfarið, busy, busy... Jólin voru skemmtileg, og gjafirnar magnaðar! Fyrir utan 3 bækur og aðra fallega og góða hluti fékk þessi hérna video-dvdspilara! Engin smá græja það.
Þá eru áramótin framundan, brúðkaup í fjölskyldunni á gamlársdag. Okkur hér í Tindaseli 1f leiðast persónulega áramótin, við erum í felum undan hávaðanum í skoteldunum, þ.e. ég og sá ferfætti.
Maður er óttalega andlaus eitthvað, var í kaffiboði milli vinnu og vinnu hjá Lilju systur, indælt og gott. Það var setið við arininn og drukkið kaffi og púrtvín með. Held ég hafi aldrei smakkað það áður, bara nokkuð gott. Skúringarnar gengu vel, menn hafa ekki verið mikið að vinna á Stöð2 í dag, vonandi verða þeir alveg rólegir framyfir áramótin. Á miðvikudagsmorguninn er meiningin að kórinn mæti í Ísland í bítið, taki þar 2-3 lög og eitthvað verður spjallað líka. Verður vonandi skemmtilegt.
Bless í bili.

Er líða fer að jólum.

2004-12-15T14:00:00.000Z

Nú fer að styttast í jólin, snjórinn kominn og allt. Ég meira að segja búin að kaupa eina eða tvær jólagjafir, og þá er nú mikið sagt.
Hér í vinnunni er gjörsamlega allt að verða vitlaust, allir að fara á límingunum. Mikið verður gott að komast heim.

Jæja,

2004-12-12T21:22:00.000Z

eins og snarpir lesendur mínir hafa séð, (einn lesandi ennþá...) þá var mikill fögnuður fólginn í því að vera búin að þrífa kvikmyndahúsið í fyrrinótt. Var rétt skriðin í bælið um hálfri stundu eftir miðnætti í gærkvöld, þegar síminn hringdi og ég spurð hvort ég ætti ekki að vera mætt í kvikmyndahúsið? Það fór auðvitað nettur hrollur um mig, svaraði ísköld neitandi. Nú? Spurði hann, mér var sagt að þú yrðir um helgar hér framvegis? Á þeim tímapunkti hefði enginn getað boðið mér upp á neitt meira óspennandi en það. Vona að hann hringi ekki aftur á næstunni... annars var hann ágætur greyið, bara misskilningur á ferðinni, lack of communication, spilar kannski eitthvað inn í að hann er af erlendu bergi brotinn, nánar tiltekið frá Túnis!
Ég var að horfa á Jólaboð með Hemma Gunn á Channeltwo, fínn þáttur, soldið geldur, vantaði tilfinnanlega Gospelkór Reykjavíkur. Sérstaklega þar sem hann var á playbacki hjá Palla Rós... mistök það.
Búin að baka tvöfaldan venjubundinn skammt af lagköku, sem gjarnan er kölluð brúnt hvítt hér. Kenndi samstarfskonu minni einni að baka hana, hún er uppalin á suðurhveli jarðar, þar tíðkast víst ekki að hafa þessi ósköp fyrir lífinu, eins og að smyrja deigi á fjórar heilar ofnplötur til að leggja þær saman með kremi og skera niður í kökur, held að tímakaupið sé reyndar ekki hátt í þessu. En, þær eru bestar.
By the way, hér er til mikið af afskorningi, hann liggur hér frammi fyrir gesti og gangandi.
Vinnuvika framundan, all good in my hood.

Kærleikur, trú og VON, magnað fyrirbæri.

Pop.

2004-12-11T20:12:00.000Z

Ég eyddi nóttinni í að þrífa bíó. Hljómar ekki eins hræðilegt og það var, get lofað því. Hefur t.d. einhver gert sér grein fyrir því að það er manneskja í því sem næst fullu starfi við að "blása" popcorni úr þessu tiltekna bíói? Þá er allt annað eftir, það þarf að þrífa klósett, skúra klístrað kók upp af gólfum, skafa upp tyggjóklessur, ópal, hlaup, ís, ostasósu... Power to the people who do that for a living!
Jæja, þessi fer að snúa sér að jólaundirbúningi, bakstur og einhver innkaup þessa helgi. Nú fer að verða gaman að þessu!

Friður.

ennþá fimmtudagur

2004-12-09T21:51:00.000Z

Það er ennþá fimmtudagur, þetta er annað hvort í ökkla eða eyra hjá mér, eins og reyndar margt annað. Annað hvort skrifa ég ekki í marga daga eða oft á dag!
Oh well... sjónvarpsupptakan gekk mjög vel, við skemmtum okkur vel. Hér er búið að éta yfir sig af kjúklinga- cesar salati, það var æðislega gott.
Gott að vera heima í kvöld, fara í gott bað og hugga sig.
Friðsælt.

hratt flýgur stund...

2004-12-09T08:59:00.000Z

Síðast var mánudagur, nú er allt í einu kominn fimmtudagur! Man, time flies when you have fun.
Hér var ég búin að skrifa voða fína klausu, týndi því svo öllu.. ekki alveg búin að læra á þetta.
Jólatónleikar Fíladelfíu voru æðislegir, gæsahúðin gagntók mann sérstaklega þegar Hrönn söng lagið hennar Crystal Lewis.
Nú æðum við í höfuðstöðvar Rúv í dag og tökum upp með hávaða og látum. Herlegheitunum verður svo sjónvarpað þann 18.þ.m. þegar grunlausir landsmenn sitja í rólegheitum og horfa á Gísla Martein.
Allt að gerast hér í Póstmiðstöð, mikið stress að byrja að grípa um sig eins og vera ber þegar húsið er að fyllast af pökkum og bréfum. Spyrjum að leikslokum.

Friður á jörð..

Nú.

2004-12-06T21:41:00.000Z

Mánudagurinn búinn, hundurinn búinn að fá árlega tékkið sitt og sprautu með tilheyrandi skjálfta og stressi. Ég bókstaflega dró hundinn yfir þröskuldinn, hann var ekki mjög tignarlegur við þær aðstæður... En lyftist nú allur upp þegar dýralæknirinn fór að tala við hann, þótti hundurinn með afbrigðum unglegur og vöðvastæltur. Ég er ekki frá því að ég hafi séð hann rétta úr sér þegar hún byrjaði að hæla honum. Gæti verið ímyndun mín. Ekki fréttist enn af bróður mínum, sem hótaði fyrir 3 vikum síðan að gifta sig í lok árs, móðir mín bíður mjög spennt. Vill fyrir alla muni drífa í því að fara að tala um sameiginlega brúðargjöf okkar til þeirra, skilur ekki þessi voðalegu rólegheit yfir málinu. Ég vil endilega bíða eftir að vera boðið í brúðkaupið áður en ég fer að kaupa gjöfina, systir mín vill endilega breyta dagsetningunni á brúðkaupinu. Svona erum við nú misjöfn mannfólkið.
En nú er það bara koddinn.
Góða nótt.

sunnudagur..

2004-12-05T09:18:00.000Z

Jæja. Kominn tími til að gerast bloggari. Góð helgi að verða búin, sunnudagar eru bestu dagarnir. Sérstaklega þegar veðrið er svona eins og í dag, rok og rigning. Kórinn söng í KFUM á söngsamkomu í dag, bara hörkustuð. Troðfullur salurinn, grenjandi stemning. Rosalega er sjónvarpið leiðinlegt á sunnudagskvöldi, bara endalaus bið eftir dauðanum eins og góður maður sagði. Nú er það bara snemma í rúmið, ekkert droll... Voffi fer til dýralæknis á morgun, árlega heimsóknin með tilheyrandi sprautu og ormalyfi, heilmikið stress. Hann er drulluhræddur þegar hann kemur þar inn, ekki ólíkt mér þegar ég kem á tannlæknastofu.

Meira síðar.